National Games Goa 2023 Rowing: गोव्यात सध्या 37 व्या राष्ट्रीय क्रीडा स्पर्धेची धामधूम सुरु आहे, राज्याची राजधानी पणजीपासून सुमारे 20 किमी अंतरावर असलेल्या शापोरा नदीजवळ रोइंग स्पर्धेचे आयोजन करण्यात आले आहे.

राज्यात अद्याप रोइंग खेळासाठी पायाभूत सुविधा निर्माण झाल्या नाहीत. रोइंगसाठी स्थिर पाणी आणि दोन किलोमीटर किंवा त्याहून अधिक सरळ कोर्स आवश्यक असतो.

खेळासाठी आवश्यक अटी पूर्ण करू शकतील अशी जागा शोधण्यास खूप वेळ लागला. नदीच्या काठावर किंवा आजूबाजूला कोणतीही रिकामी जमीन नसल्यामुळे आवश्यक पायाभूत सुविधा निर्माण करणे आव्हानात्मक होते. राज्यात सध्या भात कापणीचा हंगाम असूनही स्थानिक शेतकरी सरकारच्या मदतीसाठी पुढे आले.

रोइंग स्पर्धेसाठी केवळ दोन दिवसात जवळपास 23 शेतकर्‍यांनी आपली जमीन मोकळी केली. तसेच, नदीपात्रापर्यंत काँक्रीटचा रस्ता बांधण्यासाठी, जमीन सपाटीकरण आणि 5,000 चौरस मीटर जमीन मोकळी करण्यास जवळपास 30,000 चौरस मीटर जमीन अधिकाऱ्यांना उपलब्ध करुन दिली.

'प्रत्येक नवीन जागेची काही आव्हाने असतात. मात्र येथे गेल्या दहा दिवसांपासून जमिनीचे सपाटीकरण, तात्पुरत्या पायाभूत सुविधा निर्माण करण्याचे काम युद्धपातळीवर करावे लागले. जमिनीचे जास्त नुकसान होणार नाही याची काळजी घेणे आवश्यक होते,' असे रोइंग स्पर्धेचे संचालक इस्माईल बेग यांनी सांगितले.

शासनाने शेतकर्‍यांना नुकसान भरपाई द्यायचे ठरवले, मात्र अनेकांनी त्याबदल्यात काहीही मागितले नाही. राज्याचे क्रीडा मंत्री गोविंद गावडे यांनी याबाबत शेतकऱ्यांचे कौतुक केले आहे. शेतकऱ्यांच्या या सहकार्याबद्दल आम्ही शेतकऱ्यांचे आभारी आहोत, असे क्रीडामंत्री म्हणाले.