कुठ्ठाळी येथे आज मुरगावचे आमदार संकल्प आमोणकर यांचे स्वीय सचिव क्लीफ वाझ यांच्या घरावर दरड कोसळून घराची मोठ्या प्रमाणात हानी झाली. यात क्लीफ यांच्या आई थोडक्यात बचावल्या.

पंधरा दिवसापासून सतत पडणाऱ्या पावसामुळे झाडांची पडझड तसेच भूस्खलनाचे प्रकार घडत आहेत. आज दुपारी १२ च्या सुमारास कुठ्ठाळी येथे क्लीफ वाझ यांच्या घरावर दरड कोसळून घराची हानी झाली.

सदर दरड कोसळण्याच्या अगोदर क्लीफ यांच्या आईला मोठा आवाज ऐकू आला. यावेळी ती स्वायंपाक घरात काम करत होती. आवाज येताच ती स्वयंपाक घरातून बाहेर गेली व नेमकी स्वयंपाक घरावरच दरड कोसळली. कौलारू घर असल्याने घरात माती, दगड आले. तसेच एक मोठा दगड घरावर येऊन स्थिरावला.

दरम्यान याची माहिती मिळताच आमदार आंतोन वाझ तसेच मुरगावचे आमदार संकल्प आमोणकर यांनी घटनास्थळी येऊन पाहणी केली. यावेळी अग्निशमन दलाच्या जवानांनी घटनास्थळी येऊन अडथळा दूर केला.

दरम्यान, गेल्या आठवड्यात कुठ्ठाळी येथे जंक्शनवर मोठे भूस्खलन झाले होते. आता कुठ्ठाळी येथे आज ही दुसरी घटना. आमदार वाझ यांनी तिथे संरक्षक भिंत बांधण्यात येईल, असे सांगितले.