Goa Accident Death: फोंडा पोलिस स्‍थानकाच्‍या हद्दीत दोन ठिकाणी झालेल्या अपघातांत एकाचा मृत्‍यू झाला; तर तर दोघे जखमी झाले. जखमींना गोमेकॉत दाखल करण्‍यात आले आहे.फोंडा पोलिसांनी दिलेल्या माहितीनुसार, बोरी बगलमार्गावर झालेल्या अपघातात आशिष पाटील (२३) या तरुणाचा जागीच मृत्यू झाला.

त्याची दुचाकी रस्त्याच्या कडेला उभ्या असलेल्या ‘हिताची’ मशिनवर आदळली. ही घटना काल रविवारी रात्री साडेदहाच्या सुमारास घडली. मृत दुचाकीस्वार हा बोरीहून बेतोडा येथे जात होता. बेतोडा-बोरी बायपास रुंदीकरणाचे काम सुरू आहे.

‘हिताची’ मशीन रस्त्याच्या बाजूला पार्क केले होते. दुचाकीस्वार रस्ता रुंदीकरणाच्या ठिकाणी पोहोचल्यावर रस्त्याच्या डाव्या बाजूला गेला आणि मशिनवर धडकला. गंभीर दुखापत झाल्‍याने त्‍याचा मृत्‍यू झाला.

ढवळी येथे दोन वाहनांमध्‍ये अपघात

दुसरा अपघात ढवळी येथे सरस्वती मंदिरासमोर रस्त्यावर झाला. इनोव्हा कार फोंड्याच्‍या दिशेने चालली होती; तर पिकअप मडगावकडून येत होती. सरस्वती मंदिरासमोर पोहोचताच समोरासमोर अपघात झाल्याने इनोव्हा कारमध्‍ये असलेले यश पालयेकर (१८, फोंडा) व सिद्धी नाईक (१९, कुडचडे) जखमी झाले. त्‍यांना उपचारांसाठी गोमेकॉत दाखल करण्यात आले आहे. पुढील तपास फोंडा पोलिस करीत आहेत.