Goa Religious History: "खरा इतिहास आपल्याला शिकवला जात नाही, म्हणून हात कातरो खांबाचे महत्त्व आपणास माहित नाही. आपण आपल्या पूर्वजांच्या बलिदानाच्या इतिहासाचा अभिमान ठेवला पाहिजे. आपल्या पूर्वजांनी धर्माच्या रक्षण्यासाठी येथे बलिदान दिलेले आहे आणि ही आपली अस्मिता आहे. युनेस्कोच्या सूचीमध्ये हात कातरो खांबाचा उल्लेख झाला पाहिजे," अशी मागणी हिंदू जनजागृती समितीने केली आहे.

हात कातरो खांब ऐतिहासिक स्मारक दुर्लक्षित असून त्या ठिकाणी अतिशय घाण केली जाते. हे ऐतिहासिक स्मारक असल्याने याचे पावित्र्य जपलं पाहिजे. हात कातरो खांबाला राष्ट्रीय स्मारकाचा दर्जा द्यावा, अशी मागणी समितीचे राष्ट्रीय प्रवक्ते रमेश शिंदे यांनी सरकारकडे केली आहे.

समितीने गोवा क्रांतीदिनाच्या निमित्ताने जुने गोवे येथील ऐतिहासिक ‘हात कातरो’ खांबाच्या ठिकाणी गोवा मुक्ती लढ्यातील ज्ञातअज्ञात हुतात्म्यांना श्रद्धांजली वाहिली. गोमंतक मंदिर महासंघाचे जयेश थळी, ब्राह्मण महासंघाचे राज शर्मा, ब्रह्मकुमारी नूतन प्रमोद नानोस्कर, आलोयासिस विद्यालयाचे मुख्याध्यापक आनंद फडते, सत्यवान म्हामल आदी उपस्थित होते.