डिचोली: चोडण येथील रघुवीर आणि प्रेमावती साळकर उच्च माध्यमिक विद्यालयात काल ‘हिंदी दिवस’ विविध कार्यक्रमांनिशी उत्साहात साजरा करण्यात आला. मयुर नाईक, दिव्यता बेतकेकर, प्रेरणा न्हावेलकर, बबली प्रसाद, पुजा प्रसाद, ईवांका पेडणेकर, नंदिनी भोमकर, कार्तिक मातोंडकर, आदिती मार्डोळकर, सानिया नुनीस, हर्ष सावंत, साईराज बोरकर, अस्विल रॉड्रीगीस, आशिष खांडेपारकर या विद्यार्थ्यांनी कथा, कविता, पथनाट्य, नृत्य आणि गीत सादर केले.

विद्यार्थ्यांना मार्गदर्शन करताना प्राचार्य संदीप सावळ म्हणाले, हिंदी भाषेचा उपयोग प्रत्येकाने दैनंदिन जीवनात करण्याची गरज आहे. हिंदी आपल्या देशाची राष्ट्रभाषा आहे. या भाषेचा प्रचार आणि प्रसार प्रत्येक भारतीयाने केलाच पाहिजे, असे आवाहनही त्यांनी केले. प्रा. लुईझा लुईस यांनी हिंदी बोलण्याची संधी मिळेल तेव्हा त्या संधीचा फायदा घेऊन विद्यार्थ्यांनी आपले विचार हिंदी भाषेत व्यक्त करावे. यावेळी त्यांनी आपली हिंदीतील कविता वाचून दाखवली.

कार्यक्रमाच्या सुरवातीला हिंदी विषयाचे अध्यापक संतोष मळीक यांनी सर्वांचे स्वागत करून हिंदी दिवस साजरा करण्यामागील इतिहास कथन केला. कार्यक्रमाचे सूत्रसंचालन विद्यार्थीनी रेचल गावकर यांनी केले.