मडगाव : हिमाचल प्रदेशमध्ये एका 12 वर्षीय अल्पवयीन मुलीवर बलात्कार करून आरोपी गोव्यात पळून आला होता. याबाबत माहिती मिळताच, दीपक पेयांग या 27 वर्षीय आरोपीला मडगाव पोलिसांनी अटक करून हिमाचल प्रदेश पोलिसांच्या स्वाधीन केले आहे. (Himachal Pradesh Rape Accused arrested in Margao Goa)

सदर आरोपी हिमाचल प्रदेशमध्ये पोलिसांच्या रडारवर होता. पोलिसांना चुकवत तो विविध राज्यात फिरत होता. काही महिन्यांपूर्वी तो गोव्यात आला होता. मांडप नावेली येथे तो एका भाड्याच्या खोलीत राहात होता. मडगावात एका गॅस एजन्सीकडे तो लोडर म्हणून काम करत होता, अशी माहिती मडगावचे पोलीस निरीक्षक सचिन नार्वेकर यांनी दिली आहे.

दरम्यान, कोलवा पोलीस स्थानकाच्या हद्दीत एका 11 वर्षीय अल्पवयीन मुलीचा विनयभंग आणि बलात्कार केल्याने पोलिसांनी धर्मेंद्र यादव या 28 वर्षीय युवकाला अटक केली आहे.

संशयित यादव हा मूळ उत्तर प्रदेश येथील असून गोव्यात तो एका खासगी कंपनीत काम करत होता. पीडित मुलगी त्याच्या शेजारीच राहत होती. त्याने तिच्याकडे दोस्तीचे संबंध वाढवून तिच्यावर ही बळजबरी केल्याचे तक्रारीत म्हटले आहे.