राजधानी पणजीसह राज्‍याच्‍या इतर भागात सोमवारी रात्री पावसाच्‍या जोरदार सरी कोसळल्‍या. ग्रामीण भागात तर विजांचा लखलखाट आणि ढगांच्‍या गडगडाटासह पाऊस पडला. त्‍यामुळे वीजही ‘गुल’ झाली. परिणामी बहुतांश भागात काळोख पसरला होता. डिचोली, साखळी, वाळपई, कुळे, काणकोण, सांगे, फोंडा, सावर्डे येथे रात्री उशिरापर्यंत पाऊस सुरूच होता.

गेल्या अनेक दिवसांपासून उकाड्याने लोक हैराण झाले होते. त्यात कालपासूनच ढगाळ वातावरण होते. आज उष्णता आणखी वाढली होती. सर्वजण चातकासारखी पावसाची वाट पाहत होते.

आजही शक्‍यता

राज्यात मंगळवार दि. 23 मे रोजी काही ठिकाणी हलका तर काही ठिकाणी मेघगर्जनेसह पाऊस पडण्याची शक्यता हवामान खात्याने व्‍यक्त केली आहे. वारेही जोरदार वाहणार असून, मच्‍छीमारांनी मासेमारीसाठी समुद्रात जाऊ नये असा इशारा देण्‍यात आला आहे.