Post-Monsoon Damage in Belgaum, Hubli, and Kolhapur Drives Up Vegetable Prices In Goa

पणजी: राज्यात मागील दोन-तीन महिन्यांपासून भाजीपाल्याच्या दरात मोठ्या प्रमाणात वाढ होत आहे. शेजारील बेळगाव, हुबळी, कोल्हापूर परिसरात मॉन्सूनोत्तर पावसामुळे कांदा, टोमॅटो, भाजी पिकांचे मोठ्या प्रमाणात नुकसान झाले आहे. त्यामुळे भाजीपाल्याची आवक कमी झाल्याने बाजारात सर्व प्रकारचा भाजीपाला महागला आहे.

शेतमळ्यात पाणी साचल्याने भाजीचे पिक नष्ट झाले. त्यामुळे शेतकऱ्यांचे मोठ्या प्रमाणात नुकसान झाले आहे. कांदा, टोमॅटो आणि बटाट्याच्या दरात मोठ्या प्रमाणात वाढ झाली असून टोमॅटो, कांद्याचे दर अजूनही भडकलेलेच असल्याने या महागाईच्या भडक्यात सर्वसामान्य जनता भरडली जात आहे.

पणजी बाजारात टोमॅटो काही ठिकाणी ६० रुपये तर काही ठिकाणी ८० रुपये प्रती किलो दराने विकला जात आहे. त्या सोबतच जुना कांदा ८० रुपये व नवा कांदा ६० रुपये प्रती किलो दराने विकला जात आहे. बिन्स १५० रुपये किलो दराने विकले जात असून आले २०० रुपये किलो तर लसूण ४०० रुपये किलो दराने विकला जात आहे.

लसूण ६०० रुपयांपर्यंत विकला जात आहे.पालेभाज्या तसेच फळभाज्यांच्या किमतीमध्ये देखील मोठ्या प्रमाणात वाढ झालेली आहे. उत्तम आरोग्यासाठी फळे देखील खरेदी करणे मध्यमवर्गीयांना आता परवड नाहीत. बाजारात स्थानिक पालेभाज्यांची आवक कमी झाली असून आंबाडे, भाजीची केळी, काटेकणगी, करांदे मोठ्या प्रमाणात दाखल झाले आहेत. त्यांना चांगली मागणी आहे.

राज्यात पावसाळ्यानंतर अळू माडी काढण्यात येते. या अळू माडीला मोठ्या प्रमाणात बाजारात मागणी असते. आता ही अळू माडी बाजारात दाखल झाली असून तिला मोठ्या प्रमाणात मागणी आहे. मध्यम आकाराची एक माडी १०० ते १५० रुपयांना विकली जात आहे.