डिचोली: मंगळवारी पडलेल्या कोसळधार पावसावेळी (Heavy Rain) डिचोली तालुक्यातील (Bicholim) हरिजनवाडा-कासारपाल येथील राजेंद्र भीकारो परवार यांच्या घराच्या भिंतीची पडझड झाली. अशी माहिती डिचोलीचे मामलेदार प्रवीणजय पंडित यांनी दिली. तर बोर्डे आणि मये येथे मिळून दोन ठिकाणी रस्त्यावर झाडे कोसळली. या पडझडीत वित्तहानी वा अन्य आपत्ती ओढवली नाही. अशी माहिती डिचोली अग्निशमन दलाकडून मिळाली आहे. (Heavy rains cause houses to collapse in Bicholi)

मुसळधार पावसामुळे जनजीवन विस्कळीत झाले आहे. ठिकठिकाणी वाहतूक कोंडीचेही प्रकार घडले. लावणी आदी शेतीकामासाठी पूरक असा पाऊस पडत असला, तरी कोसळधार वृष्टीमुळे शेतीकामात अडथळा निर्माण होत आहे.

पावसाने रौद्रावतार धारण केला असला, तरी महाराष्ट्रातील तिळारी धरणातील पाण्याची पातळी मंगळवारी सायंकाळपर्यंत नियंत्रणात होती. अशी माहिती मिळाली आहे. मुसळधार पावसामुळे साळ गावातून वाहणाऱ्या शापोरा नदीच्या पाण्याची पातळी वाढून ही नदी तुडूंब भरल्याने 'तिळारी'तून जलविसर्ग सुरु झाला की काय, अशी भिती शापोरा नदीकाठच्या जनतेत पसरलेली आहे. मात्र, तिळारी धरणातील पाणी नियंत्रणात असून, तूर्त धरणातून जलनिसर्गाचा धोका नसल्याची माहिती धरण प्रकल्प सूत्रांकडून मिळाली आहे.