शनिवार, ६ रोजी सायंकाळी ५ वा.च्या दरम्यान आलेल्या जोरदार वाऱ्यापावसामुळे भुईपाल-भेडशेवाडा येथील भैरो वरक यांच्या घराजवळील रस्त्यावर झाड उन्मळून वीजतारांवर पडले. यावेळी कोणत्याही प्रकारचे मोठे नुकसान झाले नाही. मात्र, काही वेळ वीजपुरवठा खंडित झाला होता तो वीज खात्याच्या कर्मचाऱ्यांनी येऊन सुरळीत केला.

या भागात शनिवारी सायंकाळी ५ वा.च्या सुमारास जोरदार पाऊस तसेच वादळ निर्माण झाले होते. या वादळाच्या तडाख्याने या भागात बऱ्याच झाडांची पडझड झाली. यामध्ये स्मिता मोटे यांच्या बागायतीमधील एक जांभळीचे झाड उन्मळून पडल्याने सुपारीच्या झाडांचे नुकसान झाले आहे.

तर भैरू वरक यांच्या घराजवळील किंदळीचे झाड उन्मळून वीजतारांवर अडकून पडले. यामुळे वीजपुरवठा खंडित झाला. वीजतारा नसत्या तर हे झाड घरावर पडून नुकसान होण्याची शक्यता होती.

या घटनेची माहिती वाळपई अग्निशमन दलाला तसेच होंडा वीजपुरवठा विभागाला देण्यात आली. त्यांनी घटनास्थळी धाव घेऊन वीजतारांवर अडकून पडलेले झाड हटवून वीजपुरवठा सुरळीत केला. यावेळी अग्निशमन दलाचे एस.के. गावकर (सब ऑफिसर), ए.व्ही. नाईक (ड्रायव्हर ऑपरेटर), शेटकर, गावकर, गावकर (सर्व फायर फायटर) आदींनी झाड हटविण्याच्या कामात हातभार लावला.