Panaji Rainfall: गोव्यात भारतीय हवामान विभागाने सलग तीन दिवस पावसाचा यलो अलर्ट दिलेला आहे. त्यात पहिल्याच दिवशी, मंगळवारी 27 जून रोजी दिवसभर पावसाची उघडझाप सुरू होती.

दरम्यान, राजधानी पणजी येथे रात्री नऊच्या सुमारास अर्धा-पाऊण तास झालेल्या मुसळधार पावसामुळे पणजीतील अनेक भागात पाणी साचले होते. एटीन्थ जून रस्ता परिसरात सर्वत्र पाणी साचले होते. अनेक दुचाकी वाहने रस्त्यावर साचलेल्या पाण्यात अडकली.

सांतीनेज भागातील अनेक सखल भाग पाण्याखाली गेले. येथील रस्त्यावरून पाण्याचे पाट वाहत होते. या पावसात वाहनधारकांची तारांबळ उडाली. अनेक रस्त्यांवर पाणी साचल्याने त्यातून वाट काढताना वाहनधारकांची कसरत होत होती.

पणजीत स्मार्ट सिटीची कामे सुरू असल्याने अनेक रस्ते खोदून ठेवले आहेत. काही रस्त्यांची कामे अपुरी आहेत. अनेच ठिकाणी रस्त्यावर चिखलाचे साम्राज्य आहे. अशा स्थितीत या मुसळधार पावसाने प्रशासनाच्या उरलेल्या मर्यादाही उघड केल्या आहेत.

रस्त्यावर पाणी साचल्याने रस्त्याकडेला पार्किंगमध्ये लावलेली अनेक वाहने एक ते दीड फूट पाण्यात बुडली होती. सुमारे अर्धा ते पाऊण तास धोधो कोसळ्यानंतर पावसाचा जोर ओसरला.

दरम्यान, आणखी दोन दिवस पावसाचा जोर चांगला राहण्याची शक्यता आहे. राज्यातील विविध भागांमध्ये अतिवृष्टीचा इशारा गोवा वेधशाळेने दिला आहे.