पणजी: राज्याच्या राजधानीत शुक्रवारी (11 ऑक्टोबर) रात्री पावसाने जोरदार हजेरी लावली. अवघ्या १५ मिनिटांच्या पावसात पणजीत पाणीच पाणी झाले. मुसळधार पावसासोबत वादळी वारे आणि वीजांचा कडकडाट पाहायला मिळाला. ताळगाव येथील रहिवासी इमारतीवर यावेळी वीज कोसळली. सुदैवाने यात कोणतीही मोठी दुर्घटना घडली नाही.

हवामान खात्याच्या गोवा वेधशाळेने शुक्रवारी राज्यात हलक्या ते मध्यम स्वरुपाच्या पावसाची शक्यता वर्तवली होती. दिवसभर राज्यात हवामान कोरडे होते. दरम्यान, सायंकाळच्या सुमारास काही ठिकाणी पावसाचे ढग जमा झाले. रात्री अकराच्या सुमारास राजधानी पणजीसह उत्तर आणि दक्षिण गोव्यात काही तालुक्यांमध्ये पावसाची नोंद झाली. पावसासह वारे आणि वीजांचा कडकडाट देखील दिसून आला.

मुसळधार पाऊस सुरु असताना ताळगाव येथे एका रहिवासी इमारतीवर वीज कोसळली. सुदैवाने यात कोणतीही दुर्घटना घडली नाही. इमारतीमधील सर्वजण सुखरुप असून, इमातीला देखील काही नुकसान झाले नसल्याची माहिती समोर आली आहे. दरम्यान, वीज कोसळतानाचे भयावह दृष्य कॅमेऱ्यात कैद झाले आहेत.

गेल्या चोवीस तासांत कुठे किती पावसाची नोंद झाली?

गेल्या चोवीस तासांत राज्यात पणजी ६०.४ मिमी, धारबांदोडा २४.४ तर, मुरगाव येथे २३.२ मिमी पावसाची नोंद झाली. याशिवाय सांगेत १५.२, केपे १५, पेडणे १४.८, साखळी ८.८ आणि दाबोळीत २.८ मिमी पावसाची नोंद झाली, अशी माहिती हवामान खात्याने दिली आहे.

दरम्यान, मान्सूनच्या परतीचा प्रवास सुरु झाला असून, महाराष्ट्रातील काही भागातून पाऊस परतला आहे. याशिवाय गुजरात, मध्यप्रदेश, उत्तप्रदेश आणि बिहारच्या काही भागातूनही मान्सून परतला आहे. पुढील दोन ते तीन दिवस कोकण, मध्य महाराष्ट्रात पावसाच्या तुरळक सरी कोसळण्याची शक्यता आहे.