राज्यातील मॉन्सूनची तारीख उलटून गेली तरी पावसाचा पत्ताच नसल्याने व वाढत चाललेल्या उकाड्यामुळे हैराण झालेल्या नागरिकांना शनिवारी (ता.10) सकाळी पडलेल्या जोरदार पावसाने सुखावले.

साखळीत सकाळी काही प्रमाणात ऊन आल्यानंतर पावसाचे ढग दाटून आले व १०.३० वा.च्या सुमारास दमदार पाऊस पडला. मॉन्सून केरळात दाखल झाल्यानंतर गोव्यात आनंदाचे वातावरण पसरले होते.

आता कोणत्याही क्षणी पाऊस बरसण्याची शक्यता प्रत्येकजण व्यक्त करीत होता. त्याचप्रमाणे गेले दोन दिवस ढगाळ वातावरण अधूनमधून दिसून येत होते. शनिवारी सकाळी मात्र पावसाची चाहूल देणारे वातावरण निर्माण झाले आणि पावसाने दमदार बरसात केली.

नाले वाहू लागले

या पावसामुळे सर्व गटर, नाले वाहू लागले होते. काही ठिकाणी गटरांमध्ये कचरा साचल्याने पाणी रस्त्यावर आले होते. या पाण्याबरोबर दगड-मातीही रस्त्यावर आली होती. याचा वाहनचालकांना त्रास होत होता. तरीही साखळी नगरपालिकेतर्फे सर्व गटरांची साफसफाई विक्रमी वेळेत करण्यात आल्याने तशी मोठी समस्या जाणवली नाही.

ढगाळ वातावरण

या पावसामुळे वातावरण थंड झाले होते. त्यामुळे काही प्रमाणात लोकांना असह्य उकाड्यातून दिलासा मिळाला होता. त्यानंतर जरासे ऊन आल्याने पुन्हा उकाडा जाणवू लागला होता. परंतु संध्याकाळी पुन्हा पावसाने वातावरण ढगाळ केल्याने थंडावा निर्माण झाला होता.