मडगाव: उपमुख्यमंत्री बाबू कवळेकर (Deputy Chief Minister Babu Kavalekar) यांच्या विरोधात केपे मतदारसंघातून निवडणूक लढविणारच या इरेला पेटलेले कवळेकरांचे पूर्वीचे स्वीय सहाय्यक अर्जुन वेळीप यांनी दिलेला सरकारी नोकरीचा राजीनामा पंचायत खात्याने फेटाळून लावल्याने त्या निर्णयाला वेळीप यांनी मुंबई उच्च न्यायालयात (Mumbai High Court) आव्हान दिले असून हा आव्हान अर्ज आता 29 नोव्हेंबर रोजी सुनावणीस येणार आहे. यासंदर्भात आज न्यायालयाने राज्याच्या एडव्होकेट जनरलच्या कार्यालयात नोटीस पाठविली आहे. या याचिकेत मुख्य सचिवांसह पंचायत सचिवांना आणि पंचायत संचालकांना प्रतिवादी करण्यात आले आहे.

वेळीप हे पंचायत सचिव म्हणून काम करीत असून त्याना विधानसभा निवडणूक लढवायची असल्याने त्यांनी आपल्या नोकरीचा राजीनामा दिला होता. मात्र त्यांच्याविरोधात चौकशी प्रलंबित असल्याचे कारण पुढे करून त्यांचा राजीनामा स्वीकारण्यात आला नव्हता. वेळीप यांनी या निर्णयाला आव्हान देत असताना यामागे राजकारण असल्याचा दावा केला आहे. आपल्याविरोधात जी तक्रार दाखल झाली होती तीही राजकीय विरोधातूनच झाली होती. मात्र त्या आरोपात काहीच तथ्य न सापडल्याने ती चौकशी आटोपती घेण्यात आली होती. मात्र आता आपल्याला निवडणूक लढविण्यापासून रोखण्यासाठी हे जुने शितपेटीत असलेले प्रकरण पुन्हा उकरून काढले आहे असा दावा वेळीप यांनी केला आहे.