पणजी : गोव्याच्या सीनियर पुरुष कबड्डी संघाची आगामी राष्ट्रीय स्पर्धेत कामगिरी चांगली व्हावी या उद्देशाने गोवा कबड्डी संघटनेने मुख्य प्रशिक्षकपदी प्रो-कबड्डी लीगमधील मार्गदर्शकाची नियुक्ती केली. यूपी योद्धा संघाचे प्रशिक्षक जसवीर सिंग राज्यातील कबड्डीपटूंना मेरठ येथील सराव शिबिरात धडे देतील.

(Guided goan players by Pro Kabaddi coaches)

गोव्याच्या सीनियर पुरुष कबड्डी संघातील सदस्य शनिवारी रेल्वेमार्गे मेरठला रवाना झाले. तेथे ते 4 ते 18 जुलै या कालावधीत यूपी योद्धा अकादमी संकुलात सराव करतील.

भारतीय हौशी कबड्डी महासंघाची 69वी राष्ट्रीय सीनियर पुरुष कबड्डी स्पर्धा हरियानातील चरखी दादरी येथे 21 ते 24 जुलै या कालावधीत खेळली जाईल. स्पर्धा मॅट्सवर होईल. गोव्याचा संघ मेरठ येथून परस्पर राष्ट्रीय स्पर्धेसाठी जाईल.

जसवीर सिंग यांच्या मार्गदर्शनाखालील यूपी योद्धा संघाने गतवेळच्या प्रो-कबड्डी स्पर्धेत प्ले-ऑफ फेरी गाठत तिसरा क्रमांक मिळविला होता. या संघाने तीन वेळा स्पर्धेची प्ले-ऑफ फेरी गाठली आहे.

गोव्याचा संभाव्य कबड्डी संघ : देवेंद्र जोशी, नेहाल सावळ देसाई, साहिश गावडे, लक्ष्मण गौडा, आकाश सिंग, भार्गव मांद्रेकर, राहुल नागावत, ध्रुविक गोयत, वेदांग कुडके, आकाश बिबोळकर, हुसेन, सुमीतकुमार पांडे

सहाय्यक प्रशिक्षक : ओमकार गावस, संघ व्यवस्थापक : सुषभ मोरजकर.