केपे: गुढी पाडव्यानिमित्त हिंदू रक्षा महाआघाडी संस्थेतर्फे काल केपे तालुक्यातील विविध हिंदू संस्थांच्या सहकार्याने कुडचडेत भव्य फेरी काढण्यात आली. गुढी पाडवा म्हणजे हिंदूंचे नवीन वर्ष असून आजच्या पिढीला आपल्या संस्कृतीची ओळख व्हावी म्हणून काल या फेरीचे आयोजन केल्याचे डॉ. गुरुदास नाईक यांनी सांगितले. हिंदू समाज विखुरला असून सर्वांनी एकत्र येऊन देशात सुख समृद्धी आणण्यासाठी प्रयत्न केले पाहिजे, असे त्यांनी सांगितले.

31 डिसेंबर हे आमचे नवीन वर्ष नसून ज्याप्रमाणे त्यादिवशी नवीन वर्षाचे स्वागत दारू पिऊन करण्यात येते ती आमची संस्कृती नसून ते पूर्णपणे चुकीचे आहे. काल जी फेरी काढण्यात आली आहे त्यातून आमच्या युवा युवतींनी प्रेरणा घेऊन आमची सनातन संस्कृती राखण्यासाठी प्रयत्न केले पाहिजे, असे त्यांनी सांगितले.

कुडचडे बाजारातून काढलेल्या या भव्य फेरीत मोठ्या संख्येने केपे तालुक्यातील देवस्थानच्या सदस्यांनी व हिंदू संस्थांनी भाग घेतला होता. दिंडी पथकाच्या टाळ - मृदंगाच्या गजरात काढण्यात आलेल्या या फेरीत महिला व युवक उत्साहाने सहभागीझाले होते.