पर्ये: राज्यपाल पी. एस. श्रीधनर पिल्लई (Governor P. S. Sridhanar Pillai) यांनी सुर्ल-सत्तरी येथे भेट देऊन तेथील निसर्गसौंदर्याचा आस्‍वाद घेतला. तसेच या गावाच्‍या नैसर्गिक विकाससाठी संधी असल्याचे मत व्यक्त केले. यावेळी त्यांच्यासोबत पर्येचे आमदार तथा माजी मुख्यमंत्री प्रतापसिंह राणे, सत्तरी तालुका उपजिल्हाधिकारी प्रवीण परब, ठाणे सरपंच नीलेश परवार उपस्थित होते.

यावेळी झालेल्या छोटेखानी कार्यक्रमात सुर्लातील ग्रामस्थांनी गावाच्‍या व आपल्‍या समस्‍या, व्यथा राज्यपालांसमोर (Governor P. S. Sridhanaran Pillai) मांडल्या. त्‍यात जमीनमालकीचा विषय प्राधान्यक्रमाने मांडला. घराची जमिनही ग्रामस्थांच्या नावावर नसल्याने बऱ्याच अडचणी येतात. या जमिनी नावावर झाल्यास शेतीसाठी (Farm) त्याचा वापर करता येईल, असे ग्रामस्‍थांनी सांगितले. राज्‍यपालांनी त्‍यांच्‍या समस्‍या ऐकून घेतल्‍या व गावाचा पर्यटनदृष्‍ट्या विकास झाला तर स्‍थानिक युवकांना रोजगाराच्या संधी उपलब्ध होतील, असे मत व्यक्त केले. राणे यांनी राज्यपालांचे स्वागत केले आणि सुर्ला (Surla) गावाला भेट दिल्याबद्दल त्‍यांचे आभार मानले.