पणजी, राज्यातील खाण व्यवसाय बंद झाल्यानंतर पर्यटन हा राज्याच्या अर्थव्यवस्थेचा कणा बनला आहे. त्यामुळे सरकारने या पर्यटन क्षेत्रावर अधिक लक्ष व भर देण्याची गरज आहे. पर्यटन क्षेत्राशी निगडित असलेल्या टॅक्सी व्यवसायावरील वादावर तोडगा काढायला हवा.

पर्यटन विधेयक मंजूर करण्यापूर्वी पर्यटन क्षेत्रातील विविध घटक तसेच किनारपट्टी लाभलेल्या मतदारसंघातील आमदारांना विश्‍वासात घेऊन यावर चर्चा करावी, अशी मागणी आमदार मायकल लोबो यांनी पर्यटन, छपाई व लेखा सामग्री तसेच माहिती तंत्रज्ञान खात्याच्या मागण्यांना पाठिंबा देताना चर्चेवेळी केली.

राज्यात गावाअंतर्गत पर्यटन, वैद्यकीय पर्यटन तसेच क्रुझ पर्यटनाला चांगली संधी आहे. क्रुझ पर्यटनाला चालना देण्यासाठी मंत्र्यांनी आमदारांबरोबर एकत्रित बसून त्यावर पर्याय काढायला हवा. जुने गोवे येथील सेंट फ्रान्सिस झेवियर शवप्रदर्शन सोहळ्याला सहा महिने बाकी आहेत. मात्र, अजूनही देश-विदेशातील पर्यटकांना या सोहळ्यासंदर्भात माहिती देण्याबरोबरच युरोप, फ्रान्स व दुबई यासारख्या देशांमध्ये त्याचे प्रमोशन कसे करता येईल यावर सरकार पातळीवर अजून काहीच रूपरेषा ठरविली गेलेली नाही.

सरकारने किनारपट्टी पर्यटनासंदर्भातची माहिती देणारी पुस्तिका प्रकाशित केली होती व त्यावर करण्यात आलेला ५ कोटींचा खर्च वाया गेला आहे. अनेक किनारपट्ट्यांवरील स्वच्छता समाधानकारक नाही. दृष्टी कंपनीचे जीवरक्षक चांगली सेवा देत आहेत.

मात्र, त्यामध्ये अधिक सुधारणा करण्यासाठी वेळोवेळी खात्याने किनारपट्टी परिसरातील आमदारांबरोबर बैठक घ्यायला हवी. जीवरक्षकांना देण्यात आलेल्या साधनसुविधांचा अभाव आहे. किनारपट्टीवर पर्यटकांवर देखरेख ठेवण्यासाठी आणखी एक स्कूटर व जीपची आवश्‍यकता आहे, असे लोबो म्हणाले.

आग्वाद कारागृहाचे गोवा मुक्तिलढ्यातील आठवणींची माहिती देणाऱ्या वस्तुसंग्रहालयात रूपांतर करण्यात आले आहे. या संग्रहालयातील माहिती विद्यार्थ्यांपर्यंत पोहोचावी यासाठी ते शिक्षण संस्थांना मोफत ठेवण्यात आले आहे. मात्र, पर्यटन खात्याकडून त्याची माहिती संस्थांपर्यंत पोहोचली नसल्याने या ठिकाणी शिक्षण संस्था विद्यार्थ्यांना घेऊन भेट देत नाहीत. त्यासाठी खात्याने या संस्थांशी संपर्क साधून विद्यार्थ्यांना गोव्याच्या मुक्तिलढ्याचा इतिहासाची माहिती देण्यासाठी या वस्तुसंग्रहालयाला भेट देण्याची सूचना करावी.

- मायकल लोबो, आमदार