वाघ आणि बिबट्यांच्या वाढत्या शिकारीच्या पार्श्वभूमीवर वन खात्याला सतर्क राहून कडक कारवाई करण्याचे निर्देश दिले आहेत असे प्रतिपादन गोव्याचे मुख्यमंत्री प्रमोद सावंत यांनी विधानसभेत केले. आज गोवा विधानसभा अधिवेशनाचा दुसरा दिवस असून मुख्यमंत्र्यांनी आपले म्हणणे मांडले.

राज्यात सध्या बिबट्यांच्या शिकारीत वाढ झाली आहे. ग्रामीण भागात रानटी प्राणांच्या शिकारीसाठी फासे लावण्यात येत असें त्यात बिबटे, वाघ अडकत आहेत. तारेच्या फासात अडकून बिबट्या मरण पावल्यावर या मृत बिबट्याची दात आणि नखे गायब होताहेत. अशा घटना वारंवार होत असून डिसेंबर महिन्याच्या शेवटच्या आठवड्यात कोपार्डे सत्तरी येथेही असाच एक बिबट्या शिकारी फासात अडकून मृत झाला होता.

वन्य प्राण्यांच्या सुरक्षेसाठी सरकार आता सतर्क झाले असून मुख्यमंत्र्यांनी बिबटे तसेच वाघांच्या शिकारीसाठी जाळी लावणाऱ्यांचा शोध घेऊन त्यांच्यावर कठोर कारवाई करण्याच्या सूचना वनविभागाला दिल्या आहेत.