केपे : सोनसाखळी चोरट्यांनी काही दिवसांपूर्वी राज्यात धुमाकूळ घातला होता. आता असे प्रकार केपेतही घडत असल्याने लोकांमध्ये भीती निर्माण झाली आहे. आज (शनिवारी) सकाळी मुलांना शाळेत सोडून परत येताना झरीवाडा केपे येथील एका महिलेच्या गळ्यातील सोनसाखळी खेचून पळवून नेल्याने या भागातील लोकांनी भीती व्यक्त केली आहे.

मिळालेल्या माहितीनुसार, झरीवाडा येथील एक महिला आपल्या मुलांना केपे येथील शाळेत सोडून परत आपल्या दुचाकीने घरी येत होती. या वेळी महिलेच्या दुचाकीचा संशयित चोरट्यांनी पाठलाग केला. महिला घराकडे निघाली असता बेतमड्डी येथे ती पोहचली असता पाठीमागून दुचाकीवरून येणाऱ्या दोघा संशयित चोरट्यांपैकी एकाने महिलेच्या गळ्यातील सोनसाखळी खेचून पळ काढला. हा प्रकार दिवसाढवळ्या घडल्याने परिसरात दिवसभरात भीती होती.

नंबर प्लेट नसलेली वाहने रस्त्यावर

केपे भागात अनेक दुचाकीस्वार वेगाने आपली वाहने हाकताना सर्रासपणे दिसत आहेत. रस्त्यावर पोलीस दिसले की आपले वाहन वळवून पोलिसांना चकवा देऊन धूम ठोकण्याचे प्रकार बरेच वाढले आहेत.

यात बऱ्याच दुचाकीला नंबर प्लेट नसल्याचे दिसून आले आहे. या दुचाकीस्वारावर वेळीच कडक कारवाई न केल्यास बेकायदेशीर कृत्ये अशीच वाढत राहणार असल्याचे लोकांचे म्हणणे होते.