Goa Fishing In Problem Due To Illegal Activities

पणजी: गोव्यातील पारंपरिक मच्छीमारी व्यवसाय गंभीर संकटात सापडला आहे. कर्नाटकहून बेकायदेशीरपणे गोव्याच्या सीमेत शिरणाऱ्या बोटींमुळे स्थानिक मासेमारी व्यवसायावर परिणाम होत आहे. यामुळे पारंपरिक मासेमारी करणाऱ्यांना मोठा आर्थिक फटका बसला आहे.

हेच व्यावसायिक मालपे येथे येणाऱ्या बोटींना पकडून मत्स्योद्योग विभागाच्या स्वाधीन करतात. सरकारचे काम आम्ही आमच्या स्वखर्चाने आणि जीवाला धोका पत्करून करत आहोत. आम्ही अशा बेकायदेशीर बोटी पकडाव्यात की आमचा व्यवसाय करावा असा प्रश्न गोवा रापोणकार एकवट संघटनेने सरकारला केला आहे.

गोवा रापोणकार एकवटचे अविनाश शिरोडकर यांनी याबाबत गंभीर चिंता व्यक्त केली. त्यांनी सांगितले की, काही दिवसांपूर्वी त्यांनी स्वतःच्या प्रयत्नांनी दोन अशाच बेकायदेशीर बोटी पकडून सरकारच्या स्वाधीन केल्या.

मात्र, सरकारकडून याबाबत पुरेशी कारवाई होत नाही. शिरोडकर यांच्या मते, सरकारने या प्रकारच्या बेकायदेशीर मासेमारीवर कडक कारवाई करून पारंपरिक मासेमारी व्यवसायाला संरक्षण देणे आवश्यक आहे.

काँग्रेस प्रदेशध्यक्ष अमित पाटकर यांनीही या मुद्याला पाठिंबा दिला. त्यांनी सांगितले की, पारंपरिक मासेमारी करणाऱ्यांना पुरेशी साधने आणि संरक्षण उपलब्ध करून देणे गरजेचे आहे.

रापोणकार एकवटचे मुद्दे

गोव्यातील पारंपरिक मासेमारी व्यवसाय बेकायदेशीर मासेमारीमुळे संकटात.

कर्नाटकहून बेकायदेशीरपणे गोव्यात शिरणाऱ्या बोटींमुळे स्थानिक मासेमारी व्यवसायाला धोका.

सरकारकडून पुरेशी कारवाई नाही.

पारंपरिक मासेमारी करणाऱ्यांना साधने आणि संरक्षण देण्याची गरज