पणजी: पोलंडमध्ये नोकरी देण्याचे आमिष दाखवून दक्षिण गोव्यातील एका युवकाला तब्बल 7 लाख 41 हजारचा गंडा घालण्यात आला. आपली फसवणूक झाल्याचे लक्षात येताच युवकाने गुन्हा शाखेच्या सायबर विभागाकडे तक्रार नोंदवली.

मिळालेल्या माहितीनुसार, आरोपीने युवकाला पोलंडमधील एका कंपनीचा अधिकारी असल्याचे भासवले आणि नोकरी देण्याचे आमिष दाखवून त्याच्याकडून पैसे घेतले. आरोपीने 7 डिसेंबर 2021 ते 9 फेब्रुवारी 2022 दरम्यान नोंदणी शुल्क, जीएसटी, विमान तिकिटे आदि खर्चासाठी त्याच्याकडून 7 लाख 41 हजार आपल्या खात्यात जमा करून घेतले.

पैसे मिळताच आरोपीने युवकाशी संपर्क तोडला. आपली फसवणूक झाली आहे हे लक्षात येताच युवकाने तक्रार नोंदवली. सायबर गुन्हा विभागाचे पोलीस अधीक्षक शोबित सक्सेना यांच्या मार्गदर्शनाखाली पोलीस निरीक्षक राहुल परब यांनी अज्ञात व्यक्तीविरोधात गुन्हा दाखल करून तपास सुरू केला आहे.