पणजी: जिल्हा पंचायत निवडणूक तिरंगी होणार, असे आजचे चित्र आहे. कॉंग्रेसची रिव्हॉल्युशनरी गोवन्स आणि गोवा फॉरवर्ड यांची आघाडी होणार की नाही, हे उद्या (ता.२२) स्पष्ट होणार आहे. भाजप राज्यभरात ५० जागा लढवणार आहे. ‘आप’ने २२ जागा जाहीर करून उमेदवारी जाहीर करण्यात आघाडी घेतली आहे.

जिल्हा पंचायत निवडणुकीची अधिसूचना अद्याप जारी व्हायची आहे. आता २० डिसेंबरला उत्तर व दक्षिण गोवा जिल्हा पंचायतीच्या मिळून ५० जागांसाठी मतदान होणार आहे. मतपत्रिकेवर होणाऱ्या या मतदानासाठी सरकारी यंत्रणा गतिमान होण्याआधीच आप आणि गोवा फॉरवर्डने आपले उमेदवार जाहीर करणे सुरू केले आहे.

काही उमेदवारांनी प्रचारासही गती दिली आहे.कॉंग्रेसचे प्रदेशाध्यक्ष अमित पाटकर आज दिल्लीत होते. त्यांनी ‘गोमन्तक’ला सांगितले, की भाजपविरोधात सर्वांनी एकत्र यावे, अशी जनभावना असल्याने कॉंग्रेसने आघाडीचा निर्णय घेतला. आम आदमी पक्षाने स्वतंत्रपणे निवडणूक लढवण्याचा निर्णय घेतला तरी सर्व विरोधकांनी एकत्र यावे, अशी आमची भावना होती. गोवा फॉरवर्ड आणि आरजी यांनी कॉंग्रेससोबत यावे, असे वाटत होते. त्यांनी तयारीही दर्शवली होती.

आमदारांनी नावे सुचवली तरी उमेदवारी मिळेल, असे नाही

आमदारांनी नावे सुचवली म्हणजे उमेदवारी मिळेल असे नाही, असे स्पष्ट करून दामू नाईक म्हणाले, की उमेदवारांची नावे जाहीर झाली की मी काय म्हणतो आहे ते समजून येईल. आमदारांचे म्हणणे तसेच मुख्य कार्यकर्त्यांचे म्हणणे विचारात घेऊनच निर्णय घेतले आहेत. प्रदेश निवडणूक समितीची येत्या दोन दिवसांत बैठक होऊन उर्वरित जागांवरील उमेदवारांबाबत निर्णय घेतले जातील.

...तर युतीबाबत पुनर्विचार; आरजी

आम्ही गोवा फॉरवर्ड आणि कॉंग्रेससोबत जी युती केली आहे, ती एका नव्या सुरुवातीसाठी आहे आणि ती आम्हाला तोडायची नाही; परंतु जर युतीमधील पक्षांनी फुटिरांना प्रवेश दिला तर आम्हाला युती कायम ठेवायची का, याबाबत पुनर्विचार करावा लागेल. त्यामुळे गोवा फॉरवर्ड आणि कॉंग्रेसने याबाबत भूमिका स्पष्ट करावी, अशी मागणी ‘आरजी’चे प्रमुख मनोज परब यांनी केली आहे.

७ जागांवर भाजपचे उमेदवार निश्‍चित

भाजपचे प्रदेशाध्यक्ष दामोदर नाईक यांनी सांगितले, की ७ जागांवरील उमेदवार निश्चित झाले आहेत. निवडणूक अधिसूचना आली की यादी जाहीर करण्यात येईल. अनेक जागांवर २, ३, ४ जणांची नावे चर्चेत आहेत. उमेदवाराची पक्षनिष्ठा, जिंकून येण्याची क्षमता, लोकप्रियता या मुद्यांवर माहिती घेतली जात आहे. मी स्वतः विविध मतदारसंघांचा दौरा करत आहे. आजच सांगे, केपेचा दौरा केला.

स्थानिक गटांना हवा ‘आप’चा पाठिंबा

‘आप’ने उमेदवार जाहीर करण्यात आघाडी घेतल्यानंतर जिंकून येऊ शकतील अशा ७ जणांनी पक्षाकडून निवडणूक लढवण्याची तयारी दर्शवली. पुढील यादीत त्यापैकी ४ जणांचा समावेश असेल. शिवाय काही मतदारसंघांत स्थानिक गटांनी ‘आप’चा पाठिंबा मागितला आहे. त्याबाबतही चर्चेनंतर निर्णय घेतला जाईल.

काँग्रेसच्या बैठकीत काय निर्णय होणार?

काँग्रेस जिल्हा पंचायतीचे काही मतदारसंघ आपले बालेकिल्ले मानतो. त्यापैकी काहींवर आघाडीत असू शकणाऱ्या पक्षांकडून दावे केले गेले आहेत. पक्षश्रेष्ठींशी बोलून त्यावर तोडगा काढला जाणार आहे. त्यासाठी प्रदेश निवडणूक समितीची बैठक (ता. २२) बोलावण्यात आली असून त्‍यात याविषयी चर्चा केली जाणार आहे.

काँग्रेसशी आघाडी फायदेशीर नव्हती

आम आदमी पक्षाचे राज्य संयोजक ॲड. अमित पालेकर यांनी सांगितले, की यापूर्वी १४ व आता ८ मिळून २२ उमेदवार जाहीर केले आहेत. आणखीन ८ जणांची यादी तयार असून दोन दिवसांत ती जाहीर केली जाईल. ते म्हणाले, की कॉंग्रेस आणि गोवा फॉरवर्डशी आघाडी करून पक्षाला फारशी मदत होणारी नव्हती.