Winter Season: सत्तरी तालुक्यात सर्वाधिक उंच हिल स्टेशन म्हणून सुपरिचित असलेल्या सुर्ला गावात सध्या हिवाळ्यात अतिशय वास्तववादी आल्हादायक अनुभव घेता येत आहे. सुर्ला गावच्या पठारावर रात्रीचे तुंबू घालून अनेकजण एक दिवस सुट्टीचा आनंद अनुभवण्यासाठी येत आहेत. हा नाईट कँपिंगचा आनंद सर्वांनाच आल्हाददायी वाटत आहे. या परिसरात असलेली मोठे मोठी उंच जंगली झाडे आनंद व्दिगुणीत करणारी ठरत आहेत. तसेच या परिसरातील सुर्ला धबधब्याचे विहंगम दृश्य डोंगरमाथ्यावरून न्याहाळता येत आहे.

झाडीतून येणारे पांढरे शुभ्र धुके अशा रम्य सुर्लाच्या परिसरात कर्नाटकातून पाण्याचा प्रवाह गोव्याच्या हद्दीतील खोल दरीत झेपावताना दिसतो. जवळपास तीन - चार कि. मी. वरून याचा आनंद घ्यावा लागतो. काही भागात प्रचंड दरी आणि तसाच कडा आहे. सत्तरी तालुक्याला हे निसर्गसौंदर्याचे देणे आहे. याचा आनंद सध्या पर्यटक लूटत आहेत. चोर्ला घाट काढल्यानंतर कर्नाटक सिमेवर असलेले हे सुर्ला गाव. तेथील विस्तीर्ण असे पठार व देवराई मन प्रसन्न करून सोडते.

डॉ. देविदास कोटकर, निसर्गप्रेमी-

सुर्ला गाव निसर्ग वैभवच आहे. तेथील लोकजीवन जाणून घेऊन परिसरात असलेली जंगलातील सुरेख देखणीय झाडे, रात्रीची, पहाटेवेळी पडणारी शरीराला आनंददायी देणारी थंडी अनुभवावीच. नाईट कँपिंग हे हिवाळ्यात विशेष महत्व लोकांना आहे. समुद्र सपाटीपासून उंचावर असलेले हे सुर्ला गाव हवेहवेसे वाटणारे आहे.