पणजी: राज्यात (Goa) गेल्या काही दिवसांपासून थंडीचे प्रमाण वाढत चालले आहे. या कडाक्याच्या थंडीमुळे (Winter) गोव्यातील ग्रामीण भागात लोक शेकोटी पेटवून बसलेले आढळत असून स्वेटर, गरम कपडे परिधान करीत आहेत. (Goa Weather Updates)

गेल्या काही दिवसांपासून काले, जत्रा तसेच धालोत्सवांना देखील सुरवात झाली असून नागरिकांना या थंडीचा बराच त्रास होत आहे. थंडीमुळे पडणाऱ्या धुक्याचा त्रास रात्री प्रवास करणाऱ्या नागरिकांना होत आहे, तसेच विविध प्रकारचे आजार देखील वाढत आहेत. थंडी, खोकला, पडसे, घसा बसणे, त्वचा फुटणे अशा प्रकारांत वाढ झालेली आहे.

भारतीय हवामान खात्याच्या गोव्यातील केंद्राने दिलेल्या माहितीनुसार 16 जानेवारीपर्यंत राज्यातील वातावरण कोरडे राहील तर काही ठिकाणी धुके पडण्याची शक्यता वर्तविली आहे. गेल्या चोवीस तासांत पणजी येथे कमाल तापमान 29 होते, तर किमान तापमान 17.2 एवढे नोंद झाले आहे.

किमान तापमानात होत असलेल्या घसरणीमुळे थंडी वाढली आहे. अनेक भागांत पहाटेच्या वेळी धुक्‍याची दुलई पसरू लागली आहे. पुढील दोन दिवसांमध्ये राज्याच्या तापमानात घट होणार असून, मुख्यत: कोरड्या हवामानाचा अंदाज वर्तविण्यात आला आहे.

डॉक्टरांचा सल्ला राज्यात वाढत असलेल्या थंडीमुळे अनेकजण आजारी पडत आहेत. त्यामुळे नागरिकांनी खबरदारी घेणे जरूरीचे आहे. नागरिकांनी शक्यतो उकळून गार केलेले पाणी प्यावे, तेलकट पदार्थ तसेच थंडपेय, आईस्क्रीम आदी पदार्थांचे सेवन करणे टाळावे.