Goa Weather Update Rising Temperatures Yellow Alert Issued

पणजी: राज्यात गेल्या काही दिवसांत उकाडा प्रचंड प्रमाणात वाढला आहे. वाढत्या उकाड्याने गोमंतकीय हैराण झाले आहेत. सोमवारी (3 मार्च) राज्यातील तापमान वाढ कायम राहिली. राजधानी पणजी येथे 37 अंश सेल्सियस कमाल तापमानाची नोंद झाली.

उष्णतेचा यलो अलर्ट

दरम्यान, 3 ते 5 मार्च या कालावधीत राज्यात काही ठिकाणी वातावरण उष्ण आणि दमट राहण्याची शक्यता आहे. या तीन दिवसांसाठी हवामान खात्याने 'उष्णतेचा यलो अलर्ट' जारी केला आहे. त्यामुळे नागरिकांना आरोग्याची (Health) काळजी घेण्याचे आवाहन करण्यात आले आहे.

राजधानी पणजी तापली

मागील आठवड्याभरात राजधानी पणजीतील (Panaji) कमाल तापमान पाच दिवस 37 अंशावर गेले होते. गेल्या बुधवारी फेब्रुवारी महिन्यातील पाचव्या दिवशी पणजीमध्ये सर्वाधिक तापमानाची नोंद झाली. गोव्यातील सामान्य वातावरण उष्ण आणि दमट असले तरी हवामान खात्याकडून उष्णतेच्या लाटेचा इशारा दिल्याने आणखी चिंता वाढली आहे. सोमवारी सुद्धा राज्यातील अनेक ठिकाणी उष्णतेची तीव्रता कायम होती.

राज्यातील तापमान

सोमवारी पणजीत किमान 23.5 अंश तर मुरगावात किमान 23.3 अंश सेल्सिअस तापमानाची नोंद झाली. येत्या काही दिवसात राज्यातील किमान तापमान 22 ते 23 अंश सेल्सिअस पर्यंत राहण्याची शक्यता आहे.