काणकोण,काणकोणात शेतीची लागवडीच्या काळात गेल्या पंधरा दिवसांत मुसळधार पाऊस झाल्याने भातशेतीची कामे अर्धवटच आहेत. तर काही ठिकाणी मुसळधार पावसामुळे रोपे वाहून गेली.

आतापर्यत काणकोणात सुमारे ६० टक्के शेतीची लागवड पूर्ण झाली आहे.सध्या पाऊस ओसरल्याने भातशेती व बागायतीच्या नुकसानीची पाहणी करण्यात येत आहे दोन दिवसांत नुकसानीचा अहवाल देण्यात येणार असल्याचे विभागीय सहाय्यक कृषी अधिकारी सर्वानंद सर्वणकर यांनी सांगितले.

सर्वात जास्त नुकसानी गावडोंगरी पंचायत क्षेत्रातील भूपर,तुडल व खोतीगाव पंचायत क्षेत्रात तसेच आगोंद पंचायत क्षेत्रातील शेतीची हानी झाली आहे, असे विभागीय कृषी अधिकारी सर्वणकर यांनी सांगितले.

गावडोंगरी व खोतीगावातील शेती वाहून गेली आहे, तसेच लागवडीसाठी तयार तरवाही वाहून गेला आहे. काणकोणातील बहुतेक शेतकरी ज्योती, कर्जत, जया या भात बियाणांना पसंती देतात.

गोवा धन -३, रत्नागिरी -६ या भात बियाणांची पेरणी शेतकऱ्यांकडून केली जाते.अनुसुचित जमातीच्या शेतकऱ्यांना रासायनिक खतावर अनुदान दिले जाते. मात्र कृषी खाते सध्या जैव खताला प्राधान्य देत आहे. शेतकरी शेणखताचा वापर करून भात पीक घेत आहेत, असे जानू गावकर व कृष्णा गावकर यांनी सांगितले.