Goa Weather : मॉन्सूनच्या आगमनाबाबत देशभर तर्कवितर्क सुरू होते, हवामान विषयक माहिती देणाऱ्या खासगी संस्थांनी भारतीय हवामान खात्याच्या मॉन्सूनच्या आगमनविषयी आक्षेप नोंदवला होता. मात्र, गेल्या दहा दिवसांपासून ज्या मॉन्सूनची प्रतीक्षा होती,तो अखेर आज राज्यात दाखल झाला आहे.,अशी माहिती अधिकृतरित्या गोवा वेधशाळेने दिली आहे.

बंगालचा उपसागर आणि अंदमान निकोबार बरोबर केरळमध्ये काही दिवस अगोदर दाखल झालेला मॉन्सून राज्याच्या वेशीवर तब्बल दहा दिवस रेंगाळला होता. यावरून हवामानविषयक जगभरातील तज्ज्ञांनी भारतीय हवामान खात्याला लक्ष्य केले होते. अखेर नैऋत्य मौसमी वाऱ्याचा वाढलेला वेग तसेच समुद्रावरून येणारी आर्द्रता याचा मिलाफ होऊन हवामान खात्याने मॉन्सून पुढे सरकल्याचे जाहीर करून संपूर्ण गोवा मॉन्सूनने व्यापल्याचे स्पष्ट केले आहे.

वेधशाळेचे वैज्ञानिक एम. राहुल म्हणाले,मॉन्सूनसाठीची पोषक स्थिती निर्माण होण्याबरोबरच मॉन्सूनसाठीचे निकष पूर्ण झाल्याने हवामान खात्याने मॉन्सून पुढे सरकल्याचे जाहीर केले आहे. राज्यात सर्वत्र पावसाच्या जोरदार सरी पडत असून काल संध्याकाळपासून मॉन्सूनचे ढग जमत असल्याचे दिसत होते.