पणजी: गेल्‍या काही दिवसांपासून राज्‍यात सातत्‍याने कोसळत असलेल्‍या पावसाने धारबांदोडा आणि सांगे या दोन केंद्रांवर इंचाचे दीडशतक पूर्ण केले आहे. तर, पेडणे, जुने गोवे, साखळी, वाळपई, फोंडा, काणकोण आणि केपे या केंद्रांवरही इंचाचे शतक पूर्ण करीत पावसाने दीडशतकाच्‍या दिशेने वाटचाल सुरू केली आहे.

पुढील सहा दिवस राज्‍यात मध्‍यम स्वरूपाचा पाऊस कायम राहील असा अंदाज वर्तवत राज्‍य हवामान विभागाने यलो अलर्टही जारी केला आहे. मान्‍सूनचा पाऊस यंदा राज्‍यात अंदाजाच्‍या सुमारे बारा दिवस आधीच दाखल झाला. त्‍यानंतर पुढील काही दिवस हजेरी लावल्‍यानंतर मध्‍यंतरीच्‍या काळात त्‍याने बराचवेळ विश्रांती घेतली होती.

गणेश चतुर्थीच्‍या काही दिवस आधी अरबी समुद्रात कमी दाबाचा पट्टा तयार झाल्‍याने मान्‍सूनला पोषक वातावरण मिळाले. त्‍यामुळे चतुर्थीच्‍या आधीपासूनच पावसाने राज्‍यभर हजेरी लावली. गेल्‍या चार–पाच दिवसांत राज्‍यातील सर्वच भागांमध्‍ये मुसळधार पाऊस पडला. त्‍यामुळे धारबांदोडा आणि सांगे या केंद्रावरील पावसाच्‍या इंचाचे दीडशतक पार झाले.

तर, शतकी खेळी केल्‍यानंतर पेडणे, जुने गोवे, साखळी, वाळपई, फोंडा, काणकोण आणि केपे या केंद्रांवर दीडशतकाच्‍या दिशेने पावसाची वाटचाल सुरू आहे. यंदाच्‍या मान्‍सून हंगामात १ जून ते ३१ ऑगस्‍टच्‍या सकाळी ८.३० पर्यंत राज्‍यात एकूण ११३.३२ इंच पावसाची नोंद झाली. या काळात राज्‍यात सरासरी १०५.८७ इंच इतका पाऊस पडतो.

कोठे किती पाऊस पडला? (इंचात)

केंद्र पाऊस

म्‍हापसा ९६

पेडणे १०९.२९

पणजी ९३.२९

जुने गोवे १०७.०५

साखळी ११६.४०

वाळपई १४३.६७

फोंडा १२१.३१

धारबांदोडा १५० पेक्षा अधिक

काणकोण १०७.८२

दाबोळी ७८.९६

मडगाव ९५.४२

मुरगाव ७८.०५

केपे १३९.१५

सांगे १५० पेक्षा अधिक