पणजी: राज्यात मागील काही दिवसांपासून उन्हाच्या तीव्र झळा आणि अचानक पडणाऱ्या पावसामुळे नागरिक हैराण झाले आहेत. अशातच आता, भारतीय हवामान विभागानं (IMD) गोव्यासाठी १२ मे ते १४ मे २०२५ या कालावधीत पावसाचा यलो अलर्ट जारी केला आहे.

हवामान खात्याच्या माहितीनुसार, या कालावधीत राज्यातील काही भागांत वादळी वाऱ्यांसह जोरदार सरी कोसळण्याची शक्यता आहे. या पार्श्वभूमीवर नागरिकांनी सुरक्षिततेच्या दृष्टीने योग्य ती खबरदारी घ्यावी, असे आवाहन हवामान विभागाकडून करण्यात आलं आहे.

दरम्यान, आज (१२ मे) पेडणे तालुक्यात काही ठिकाणी अवकाळी पावसाने हजेरी लावली. सकाळी उन्हाने उकाडा जाणवत असतानाच अचानक काळे ढग दाटून आले आणि काही मिनिटांतच जोरदार सरी कोसळल्या. यामुळे तापमानात काहीशी घट झाली असली, तरी हवामानातील अस्थिरता नागरिकांना अधिकच त्रासदायक ठरत आहे.

सतत बदलणाऱ्या हवामानामुळे गोमंतकीय नागरिकांमध्ये संभ्रमाचे वातावरण निर्माण झाले असून, शेतीवर त्याचा प्रतिकूल परिणाम होण्याची शक्यता वर्तवली जात आहे.

अवकाळी पावसामुळे बागायतदारांनाही मोठ्या नुकसानीचा सामना करावा लागू शकतो. खास करून फळबागा, भाजीपाला आणि फुलझाडांच्या लागवडीवर त्याचा परिणाम होण्याची भीती आहे.