Water Treatment Plant सरकार आणि मुख्यमंत्री काही तरी करीत असल्याने त्याला विरोध करणे आणि त्याचे विपरीत परिणाम संपूर्ण गावाला व गावातील लोकांना भोगण्यास सोडावे ही वृत्ती समाजासाठी घातक आहे, असे प्रतिपादन मुख्यमंत्री डॉ. प्रमोद सावंत यांनी केले.

गांजे - पाळी येथे सार्वजनिक बांधकाम खात्यातर्फे जिल्हा मिनरल फाउंडेशनच्या साहाय्याने साकारलेल्या जलप्रक्रिया प्रकल्पाच्या उद्‍घाटनप्रसंगी ते बोलत होते. सार्वजनिक बांधकाम खात्याच्या पाणीपुरवठा विभागाचे मुख्य अभियंता संतोष म्हापणे, मिनरल फाउंडेशनच्या अध्यक्ष जिल्हाधिकारी मामू हागे, पाळीचे सरपंच शिवा मुळगावकर, वेळगेच्या सरपंच सामंता कामत, सुर्लच्या सरपंच विश्रांती सुर्लकर, कनिष्ठ अभियंता आगा उपस्थित होते.

सुर्ल प्रकल्पाची नासधूस दुःखदायक

सुर्ल गावातील शेतकऱ्यांना व बागायतींना मोफत पाणी मिळावे यासाठी या भागातील खाण खंदकातून पाणी पंपिंग करून ते वाहिनीद्वारे पारंपरिक पाटात सोडण्याची योजना सुमारे 4 कोटी रुपये खर्चून हाती घेतली होती.

पण लोकांना पाणी मिळणार या गोष्टीमुळे दुःखी झालेल्या काही राजकीयदृष्ट्या प्रेरित लोकांनी जलवाहिनीच जाळून टाकली. या घटनेचे बरेच दुःख झाले, असे मुख्यमंत्री सावंत यांनी नमूद केले.