पणजी/मडगाव: राज्यात यंदा पावसाचे प्रमाण कमी झाले आहे. तरीही मे महिन्यापर्यंत पुरेल एवढा पाणीसाठा उपलब्ध आहे, पाण्यासंदर्भात घाबरून जाण्याची कोणतीही गरज नाही. पाण्याचे योग्य नियोजन जलस्रोत व पेयजल खात्यांकडून केले जात आहे. मात्र, जनतेने पाण्याचा जपून वापर करणे आवश्यक आहे, असे मत पेयजलमंत्री सुभाष फळदेसाई यांनी व्यक्त केले आहे.

मडगावातील एका कार्यक्रमानंतर पत्रकारांनी विचारलेल्या प्रश्नावर फळदेसाई बोलत होते. ते म्हणाले, राज्यातील जलसाठ्यांमध्ये मुबलक प्रमाणात पाणी उपलब्ध आहे; पण योग्य नियोजन केल्यास पुढील वर्षी मे आणि जून महिन्यापर्यंत तो साठा पुरू शकतो. येत्या महिनाभरात पावसाचे प्रमाण कसे राहते याकडे प्रशासन लक्ष ठेवून आहे. साळावली धरणाचा ओव्हरफ्लो अजूनही सुरू आहे, ही महत्त्वाची बाब आहे. हा ओव्हरफ्लो नोव्हेंबरपर्यंत कायम राहिल्यास दक्षिण गोव्यातील पाणीपुरवठा सुरळीत असेल.

आवश्यक नियमावली जारी करू!

खाणीच्या खंदकातील पाणी शुद्ध करून ते पुन्हा उपयोगात आणण्याचा विचार सुरू आहे. गेल्या अनेक वर्षांत राज्यात पाण्याची टंचाई भासली नाही. गरजेनुसार सरकारकडून टँकरद्वारे पाणीपुरवठा केला जाईल आणि वेळोवेळी आवश्यक नियमावली जारी केली जाईल; परंतु पाण्याची उपलब्धता आणि परिस्थितीचा सतत आढावा घेतला जात आहे. गरजेनुसार जनतेसाठी मार्गदर्शक सूचनाही जारी केल्या जातील. स्थानिक जलस्रोताचा वापर करून पाणीपुरवठा सुरळीत ठेवण्याचे प्रयत्न सुरू असल्याचे फळदेसाई यांनी नमूद केले.

लोकसेवेसाठी राजकारणात!

आगामी विधानसभा निवडणुकीवर सुभाष फळदेसाई म्हणाले की, मी केवळ आमदार होण्यासाठी काम करीत नाही. सांगे मतदारसंघ आरक्षित झाल्यास पक्षाच्या सूचनेनुसार आपण काम करू. पक्ष सांगेल त्या ठिकाणाहून आपण निवडणूक लढवण्यास तयार आहोत; कारण आपण केवळ आमदार होण्यासाठी नाही तर लोकांची सेवा करण्यासाठी राजकारणात आहोत आणि १९९६ पासून आपण भाजपसोबत आहे.