Mid Day Meal गोव्यातील शाळांना माध्यान्ह आहार पुरविणाऱ्या गोव्यातील स्वयंसेवा गटांना डावलून सरकार गुजरात येथील एका कंपनीला या कामाचे कंत्राट देऊ पहात आहे.

मात्र गोवा फॉरवर्ड पक्ष हे होऊ देणार नाही. या विरोधात आम्ही पावसाळी अधिवेशनात आवाज उठविणार, असे आमदार विजय सरदेसाई यांनी सांगितले.

आज स्वयंसेवा गटाच्या सदस्यांनी ‘गोंयकार घरात’ सरदेसाई यांची भेट घेतली. सरकार आमच्यावर अन्याय करत आहे. या अन्यायांविरोधात आवाज काढा, अशी मागणी त्यांनी यावेळी केली.

मी आताच जास्त काही बोलत नाही. मात्र या गोव्यातील गटांचे पोट मारून गुजरातच्या कंपनीला गोव्यात कोण, आणू पाहात आहे. त्यात कोण भागीदार आहेत. त्याचा फायदा कोणाला होणार? या सगळ्यांचा भांडाफोड मी विधानसभेत करेन, असे त्यांनी यावेळी सांगितले.

सरकार गोव्यातील गटांशी फक्त एक वर्षाचा करार करतो आणि गुजरातच्या कंपनीकडे 15 वर्षांचा कंत्राट करत आहे.

या गटाकडून मिळणारे जेवण योग्य प्रकारचे नाही, असे सांगून हे काम गुजरातच्या कंपनीकडे देण्यात येत आहे, असे सरदेसाई यांनी सांगितले.