Goa News: मुंडवेल वाडे येथील सेंट ॲण्ड्रयू रेसिडेन्सीमधील चौथ्या मजल्यावरील फ्लॅटला आग लागून लाखो रुपयांचे नुकसान झाले. ही आग शॉर्टसर्कीटमुळे लागल्याचा संशय घरमालकांनी व्यक्त केला आहे.

आग लागल्याची माहिती वास्को अग्नीशमन दलाला मिळताच त्यांनी घटनास्थळी येऊन आगीवर नियंत्रण मिळविले. आग लागली त्यावेळी फ्लॅटमध्ये कोणीच नसल्याने मोठी दुर्घटना टळली.

वास्को-मुंडवेल वाडे येथील सेंट ॲण्ड्रयू रेसिडेन्सीमधील मीनाक्षी नाईक यांच्या चौथ्या मजल्यावरील फ्लॅटमधून धूर येत असल्याचे कळताच, इमारतीत राहणाऱ्या प्रशांती शेट्टी यांनी अग्नीशमन दलाला आग लागल्याची माहिती दिली. ताबडतोब दाखल होऊन अग्नीशमन दलाच्या जवानांनी फ्लॅटमध्ये प्रवेश करून आग आटोक्यात आणली.

आगीमुळे हॉलचे व फ्लॅटच्या इतर ठिकाणीही मोठ्या प्रमाणात नुकसान झाले. यावेळी वास्को अग्नीशमन दलाचे फायर फायटर अमृत मिराशी, सुंदर राऊळ, मंजुनाथ शेट्टी, प्रेमानंद नाईक यांनी घटनास्थळी दाखल होऊन आगीवर नियंत्रण आणले. यावेळी वास्को वीज विभागाने इमारतीतील वीज बंद केली. घटनास्थळी वास्को पोलिस उपस्थित होते.