Valpoi: म्हाऊस-सत्तरी येथील श्री रवळनाथ देवस्थानचा पारंपरिक दसरोत्सवाला काल बुधवारपासून सुरुवात करण्यात आली. काल बुधवारी 5 पासून उत्सव सुरू झाला असून 6, 7 रोजी पर्यंत चालणार आहे. बुधवारी सकाळपासून हजारो भाविकांनी श्री रवळनाथ देवाचे दर्शन घेतले.

गावात साजरा होणाऱ्या प्रमुख सोहळ्यात सकाळपासून महत्त्वाचे विविध धार्मिक कार्यक्रम संपन्न झाले. सकाळी देवांची पारंपरिक पद्धतीने पूजा, अर्चा करण्यात आली. तर दुपारी भाविकांनी देवदर्शन घेतले. अवसररुपी देवाच्या रूपातील भाविकांनी आशीर्वाद दिेले.

तसेच, तरंगोत्सव उत्साहात साजरा करण्यात आला. त्याचप्रमाणे भुताच्या बाधा होणाऱ्यांना देवाच्या आशीर्वाद देऊन तणावमुक्त करण्याचा कार्यक्रम रात्री उशिरापर्यंत चालला.म्हाऊस गावाला या दसरोत्सवाच्या माध्यमातून महत्त्वाचे स्थान निर्माण झाले आहे.

वाळपई शहरापासून अवघ्या तीन कि.मी.अंतरावर असलेल्या या गावाला वेगळी अशी सांस्कृतिक परंपरा लाभली आहे. नवरात्रोत्सवाच्या माध्यमातून याची सुरुवात करण्यात येत असते. कारण नवरात्रीच्या प्रत्येक दिवशी देवाची वेगवेगळ्या पद्धतीने पूजा करण्यात येते. प्रत्येक दिवशी देवाला नवीन माळ घालण्याची परंपरा रूढ आहे.