Sunburn Goa 2023: खंडपीठाने दिलेल्‍या दणक्‍यामुळे 28 ते 30 डिसेंबरला वागातोर येथे होणाऱ्या ‘सनबर्न’ फेस्टिव्हलमध्ये ध्‍वनिप्रदूषण तसेच अमली पदार्थांचा वापर रोखण्‍यासाठी पोलिसांसह प्रशासकीय यंत्रणेने बाह्या सरसावल्‍या आहेत.

ड्रग्जचा वापर रोखण्यासाठी पोलिसांची विशेष शोध पथके स्थापन करण्यात येत आहेत. फेस्टीव्हलमध्ये अमली पदार्थ विरोधी मोहीम राबवण्‍यात येणार असून, तपासासाठी साध्या वेशातील पोलिसही तैनात केले जातील, अशी माहिती उत्तर गोवा जिल्हा पोलिस अधीक्षक निधीन वाल्सन यांनी आज दिली.

यापूर्वी पर्यावरण खात्याने सनबर्न तसेच मोठ्या इव्हेंट्सना परवानगी देण्यासाठी विशेष विभाग स्थापन केला आहे. त्यामध्ये जिल्हाधिकारी हे अध्यक्ष असून प्रदूषण नियंत्रण मंडळाचे सदस्य सचिव, पोलिस अधीक्षक व संबंधित भागातील उपजिल्हाधिकारी हे सदस्य आहेत.

या आदेशामध्ये परवानगी देताना तीन बाबींचा उल्लेख करण्यात आला आहे. या विभागाची बैठक लवकरच होईल व त्यावेळी सनबर्न ईडीएम फेस्टीव्हलच्या काळात ध्वनिप्रदूषणप्रकरणी आवश्‍यक त्या उपाययोजना तसेच तेथे तीन दिवस अधिकाऱ्यांची नियुक्ती करण्याबाबत निर्णय होईल, असे त्यांनी सांगितले.

प्रशासनाची अशी असेल तयारी:-

1. सनबर्नस्‍थळी पोलिसांबरोबर प्रदूषण नियंत्रण मंडळाचे अधिकारीही उपस्थित असतील.

2. सनबर्नच्या म्युझिक सिस्टिमचा आवाज त्यांना देण्यात आलेल्या परवानगीपेक्षा वाढल्यास त्याची मोजमाप करणारी यंत्रे मंडळातर्फे तेथे बसवण्यात येणार आहेत.

3. त्यामुळे जे गेल्यावर्षी उल्लंघन झाले, त्याची पुनरावृत्ती होऊ नये यासाठी तीनही दिवस पोलिस व मंडळाचे अधिकारी काळजी घेतली.

4. ध्वनी मर्यादेचे उल्लंघन झाल्यास त्वरित म्युझिक सिस्टीम जप्त करण्यात येईल, असेही स्‍पष्‍ट करण्‍यात आले आहे.