पणजी: कोरोना (Covid-19) प्रतिबंधक लसीच्या (Vaccinae) दोन डोसमधील अंतर वाढवल्यामुळे दुसरा डोस घेणाऱ्यांची संख्या मागील महिन्यात कमी होती. मात्र, आता हे अंतर संपल्यामुळे दुसरा डोस घेणाऱ्यांची संख्या पहिला डोस घेणाऱ्यांपेक्षा जास्त होत आहे. गेल्या पाच दिवसांतील आकडेवारी पाहिल्यास हे स्पष्ट होत.

आहे. दुसरीकडे राज्यात (Goa) कोरोना बऱ्यापैकी नियंत्रणात येत असून नव्या कोरोना बाधितांपेक्षा बरे होणाऱ्या रुग्णांची संख्या वाढल्यामुळे राज्यातील सक्रिय कोरोना रुग्णांची संख्याही कमी झाली आहे.

राज्यात कोरोनाची स्थिती नियंत्रणात येत असली तरी संचारबंदी (कर्फ्यू) उठविण्यास सरकार अजूनही राजी नाही. अजूनही तिसऱ्या लाटेचे संकट असल्याने सावधगिरीचा उपाय म्हणून संचारबंदी आणखी एक आठवडा वाढवण्याचा निर्णय घेतला आहे. कॅसिनो व स्पा तसेच शाळा सुरू करण्यासंदर्भात सध्या तरी कोणताच विचार सरकारचा नाही.

गेल्या मे महिन्यापासून सरकारने ही मर्यादित संचारबंदी लागू केली आहे. वारंवार ही संचारबंदीची मुदत वाढवताना त्यामधील निर्बंध शिथिल करण्यात आले आहे. दुसऱ्या लाटेत झाले त्याची पुनरावृत्ती होऊ नये म्हणून सरकारही धोका पत्करत नाही. ही संचारबंदी मुदतवाढ करताना विवाह सोहळे तसेच इतर कार्यक्रमांसाठी सध्या ५० लोकांना उपस्थिती लावण्यास परवानगी आहे त्यामध्ये वाढ होण्याची शक्यता आहे मात्र इतर सर्व निर्बंध पूर्वीप्रमाणेच लागू असतील.

कसिनो बंदच

गेल्या मार्च 20 मध्ये कसिनो, स्पा व मसाज पार्लर तसेच सिनेमा हॉल बंद झाले आहेत ते अजूनही सुरू करण्यात आलेले नाही. इतर काही व्यावसायिकांना काही अटी व निर्बंध घालून व्यवसाय सुरू करण्याची मुभा दिली आहे. सभागृहे, रिव्हर क्रूझ, वॉटर पार्क, करमणूक उद्याने, थिएटर, मल्टिप्लेक्स, मनोरंजन झोन खुले न केल्याने त्यांचा भ्रमनिरास झाला आहे.