पणजी: राज्यात मागील काही दिवसांपासून तापमानाचा पारा दिवसेंदिवस वाढत आहे. वाढत्या उष्म्याने नागरिक हैराण होत असून घामाच्या धारा लागत आहेत.

पुढील काही दिवस तापमानाचा पारा ३४ किंवा त्याहून अधिक होण्याची शक्यता गोवा वेधशाळेने वर्तविली आहे. राज्यात शनिवारी काही भागात गडगडाटासह पाऊस पडण्याची शक्यताही वर्तविण्यात आली आहे. त्यामुळे नागरिकांनी योग्य ती काळजी घ्यावी, असे आवाहन करण्यात आले आहे

शुक्रवारी राज्यात कमाल ३४.२ अंश सेल्सिअस तर किमान २३.८ अंश सेल्सिअस तापमानाची नोंद करण्यात आली आहे. सामान्य तापमानाच्या तुलनेत तापमान १.२ अंशांनी वाढले होते. त्यासोबतच, कमाल ८९ टक्के इतकी आर्द्रता नोंदविण्यात आली, जी सामान्य आर्द्रतेच्या तुलनेत १२ टक्के अधिक होती.

१.२ मिमी पावसाची नोंद

गुरूवारी राज्यातील काही भागात अवकाळी पाऊस पडला. राज्यात सरासरी १.२ मिमी इतक्या पावसाची नोंद करण्यात आली. सांखळी येथे ६.२ मिमी, धारबांदोडा ४.२ मिमी, वाळपई २.५ मिमी, सांगे २.३ मिमी, आणि जुने गोवा येथे १.१ मिमी पावसाची नोंद करण्यात आली आहे.