गोवा विद्यापीठाकडून सुधारित गुणपत्रिका देण्यास वर्षभराचा विलंब लावण्यात आला. एका विद्यार्थ्याने कायदेशीर नोटीस बजावल्यावर तासाभरात अशी गुणपत्रिका दिली. या सगळ्या घोळात त्या विद्यार्थ्यांचा कायदा पदवीचा प्रवेश हुकला, हा मुद्दा विरोधी पक्षनेते युरी आलेमाव यांनी आज शून्य तासाला विधानसभेत उपस्थित केला.

किमान २० विद्यार्थ्यांच्या बाबतीत असा प्रकार गोवा विद्यापीठाने केला आहे. गेल्या वर्षी परीक्षा उत्तीर्ण होऊनही गुणपत्रिका देण्यास विद्यापीठाने टाळाटाळ चालवली होती. अखेर कुंकळ्ळीतील एका विद्यार्थ्याने कायदेशीर नोटीस बजावल्यानंतर काही तासांतच तशी गुणपत्रिका त्याला देण्यात आली. तो कायदा पदवी अभ्यासक्रमासाठी पात्र ठरुनही केवळ गुणपत्रिका उशिरा मिळाल्याने त्याचा प्रवेश हुकला आहे. सरकारने यात लक्ष घालून अशा विद्यार्थ्यांना प्रवेश मिळवून द्यावा, असे आलेमाव म्‍हणाले. त्‍यावर, मुख्यमंत्र्यांनी या प्रश्नावर काय करता येते ते पाहतो, असे उत्तर दिले.

बाणावलीचे आमदार व्‍हेंझी व्हिएगस यांनी सांगितले की, माजोर्डा-उतोर्डा येथील किनारे दुर्लक्षित राहिलेले आहेत. त्या किनाऱ्यांकडे जाण्यासाठी गुडघाभर पाण्यातून वाट काढावी लागते. पर्यटकांच्या सोयीसाठी स्थानिक लाकडी पूल बांधतात.

कंत्राटी कामगारांना कायम करणे शक्‍य नाही: डिचोलीचे आमदार डॉ. चंद्रकांत शेट्ये यांनी सांगितले की, विविध सरकारी खात्यांमध्ये कंत्राटावर अनेक वर्षे अनेकजण सेवा बजावत आहेत. त्यांची सेवा नियमित करण्याचा विचार सरकारने करावा यासाठी एखादी योजना तयार करावी. त्‍यस उत्तर देताना मुख्यमंत्री सावंत म्‍हणाले, सर्वोच्च न्यायालयाच्या निवाड्यानुसार त्यांना सेवेत कायम करता येणार नाही. त्यांना रजा व इतर सुविधा देण्याविषयीचा सरकारने विचार चालवला असून काही पावले टाकली आहेत.