Goa Trinamool Congress: माहिती हक्क कार्यकर्ते मुन्नालाल हलवाई यांच्यावर झालेल्या हल्ल्याच्या घटनेने राज्यातील प्रत्येक सुजाण नागरिकाच्या भावनांना धक्का बसला आहे. माध्यमांना संबोधित करणाऱ्या व्यक्तीवर हल्ला करणे हा थेट अभिव्यक्ती स्वातंत्र्यावर आणि सर्वात महत्त्वाचे म्हणजे वृत्तपत्र स्वातंत्र्यावर केल्यासारखे आहे.

मुख्यमंत्री डॉ. प्रमोद सावंत यांच्या नेतृत्वाखाली राज्यात कायदा व सुव्यवस्था पूर्ण बिघडल्याने हल्लेखोरांना कोणाची भीती नसल्याचे या घटनेतून स्पष्ट झाले आहे. तृणमूल काँग्रेस पक्ष हल्ल्याचा निषेध करतो आणि हल्ला करणाऱ्याला त्वरित अटक करावी अशी मागणी करत आहे, असे पक्षाचे प्रसार माध्यम समन्वयक ट्रोजन डिमेलो म्हणाले.

कायद्याची अंमलबजावणी करणाऱ्या संस्था संगनमताशिवाय असा निर्भय हल्ला खुलेआमपणे केला जाऊ शकतो का? अभिव्यक्ती स्वातंत्र्यावर आणि विशेषत: पत्रकारितेच्या स्वातंत्र्यावरील या हल्ल्याचा तीव्र निषेध आहे.

अशा घटना दिवसाढवळ्या व्हायला लागल्या, म्हणजे कायदा व सुव्यवस्था हाताबाहेरच गेल्याचे दिसून येत आहे. पोलिस यंत्रणा खरोखरच चोख असेल, तर हल्लेखोराला लगेच गजाआड करतील, अन्यथा ते अकार्यक्षम असल्याचे सिद्ध होणार आहे, असे डिमेलो यांनी सांगितले.