सासष्टी: गेल्या वर्षी पर्यटन व्यवसाय (Goa Tourism) सुरू होऊन तो काही प्रमाणात बहरत असताना कोरोना (Covid) महामारीची दुसरी लाट सुरू झाल्‍याने सर्वकाही ठप्‍प झाले. परिणामी पर्यटन व्यवसायावर निर्भर असलेल्या व्यावसायिकांनी मोठ्या प्रमाणात फटका बसला होता. पण, आता कोरोना महामारी नियंत्रणात येऊ लागल्याने गोव्यात येणाऱ्या पर्यटकांची (Tourists) संख्या वाढली आहे. दक्षिण गोव्यातील समुद्र किनाऱ्यावर (Beach) मोठ्या प्रमाणात देशी पर्यटकांची गर्दी होत आहे, अशी माहिती गोवा शॅक मालक कल्याण सोसायटीचे अध्यक्ष क्रुझ कार्दोझ यांनी दिली.

शॅक मालकांना 2019 मध्ये ज्याप्रमाणे कोरोना महामारीचा फटका बसला होता. तसा फटका बसू नये, यासाठी गेल्यावर्षी दक्षिण गोव्यात 60 टक्केच शॅक सुरू करण्यात आली होती. गेल्या वर्षी दिवाळी तसेच नववर्षाला मोठ्या प्रमाणात पर्यटक गोव्यात आले होते. पण, नंतर कोरोनाने पुन्हा डोकेवर काढण्यास सुरवात केल्याने पर्यटन हंगाम संपण्यापूर्वी दक्षिण गोव्यातील शॅकमालकांनी सर्व शॅक बंद केली. यंदा गणेश चतुर्थीपासून गोव्यात येणाऱ्या पर्यटकांची संख्या वाढली आहे. दिवाळीला मोठ्या प्रमाणात पर्यटक गोव्यात येत आहे, असे क्रुझ कार्दोझ यांनी सांगितले.

शुल्‍कमाफी करावी

कोरोनाच्या पार्श्वभूमीवर आर्थिक संकटात पडलेल्या शॅक मालकांच्या भल्यासाठी गोवा सरकारने भरावे लागणारे पर्यटक शुल्क 50 टक्क्‍यांनी माफ केले आहे. शॅक मालकांनी सुरवातीला पर्यटन शुल्कावर संपूर्ण सूट किंवा किमान 75 टक्के सूट देण्याची मागणी सरकार दरबारी करण्यात आली होती, परंतु, सरकारने माफ केलेले 50 टक्के शुल्क बरीच मदत करणार आहे. परंतु, गोवा इलेक्ट्रॉनिक्स लिमिटेड (जीईएल) शुल्क सरकारने माफ केले नसून गोवा सरकारने हे शुल्क माफ करण्यासाठी मुख्यमंत्री तसेच पर्यटन मंत्र्यांना निवेदन सादर करण्यात आले आहे, असे क्रुझ कार्दोझ यांनी सांगितले.