Goa Tourism: गोव्यातील पर्यटन महागडे आहे, ही पर्यटकांची ओरड वारंवार खरी ठरत आहे. नव्या मोपा विमानतळावरून बाणावलीच्या एका तारांकित हॉटेलपर्यंत पर्यटकाला विमान भाड्यापेक्षाही अधिक भाडे द्यावे लागले आहे. त्यामुळे दिवसभर टॅक्सी भाडे आकारलेली ही पावती समाज माध्यमांवर चर्चेचा विषय ठरली.

गोव्यात दर्जेदार पर्यटक यावेत, असे पर्यटनमंत्री रोहन खंवटे यांना वाटत असले तरी परदेशी पाहुण्यांपेक्षा अधिक खर्च देशी पर्यटकच करतात. अशा पर्यटकांना गोव्यात आल्यानंतर येणाऱ्या लुटमारीचा अनुभव पाहता, त्यांच्यात नक्कीच नाराजीचा सूर असेल.

परंतु विमान प्रवासाला जेवढे रुपये मोजावे लागले नसतील, त्यापेक्षा जास्त टॅक्सीला पैसे द्यावे लागत असतील तर प्रवासी डोक्यावर नक्कीच हात मारून घेत असावेत.

मोपा विमानतळावरून बाणावलीच्या मेरियॉट हॉटेलपर्यंतचा प्रवास साधारण 65 किलोमीटर अंतराचा. परंतु प्रवास भाडे साधारण 3,227 धरले तर विमानतळ भाडे, सेवा शुल्क आणि जीएसटी मिळून ही रक्कम 4 हजार 148,50 रुपयांवर पोहचली.

त्यावरून ‘चार आण्याची कोंबडी आणि बारा आण्याचा मसाला’ असा धक्कादायक प्रकार या पर्यटकांच्या बाबतीत घडला. याची चर्चा आज दिवसभर समाज माध्यमांवर सुरू होती.

मोपा विमानतळावरून बाणावलीपर्यंत येण्यासाठी टॅक्सीचे 4,148,50 रुपयांचे बिल म्हणजे ‘चार आण्याची कोंबडी आणि बारा आण्याचा मसाला’ असेच म्हणावे लागेल. या बिलात 484,07 रुपयांची सेवा फी आणि 160 रुपयांची एअरपोर्ट फी आकारली आहे.

हा प्रकार पाहता भाजप सरकार सामान्यांवर बोजा टाकून धनाढ्यांचे खिसे भरते आहे, असे वाटते. अशाने गोव्याचे पर्यटन रसातळाला जाणार, हे नक्की. - युरी आलेमाव, विरोधी पक्षनेते.