Dudhsagar Festivista 2024 Information

पणजी: गोवा पर्यटन विकास महामंडळ (जीटीडीसी) आणि पर्यटन विभागाने धारबांदोडा तालुक्यातील कुळे येथील मेटावाडो मैदानावर येत्या २५ डिसेंबर रोजी सायंकाळी ६ वाजता ‘दूधसागर फेस्ताविस्ता’ एकदिवसीय उत्सव आयोजित केल्याची माहिती जीटीडीसीचे चेअरमन गणेश गावकर यांनी केली. फेस्ताविस्ता या कार्यक्रमात संगीत, संस्कृती आणि सण समारंभाचा एक अनोखा मिलाफ यात असणार आहे.

पत्रकार परिषदेला पर्यटन संचालक सुनील अंचिपाका (आयएएस), जीटीडीसीचे महाव्यवस्थापक गेविन डायस, उपमहाव्यवस्थापक दीपक नार्वेकर यांची उपस्थिती होती.

गावकर म्हणाले, ‘दुधसागर फेस्ताविस्ता‘मध्ये आकर्षक सांस्कृतिक कार्यक्रम, उत्कृष्ट स्थानिक कलाकुसर, कारागिरांचे स्टॉल आणि विविध खाद्यपदार्थांच्या स्टॉल्स असणार आहेत. समुद्री किनाऱ्याच्या पलीकडचा नैसर्गिक गोवा पर्यटकांना दाखविण्याचा हा एक उपक्रम आहे. हा पहिलाच महोत्सव असून, या फेस्ताविस्ताचा संस्मरणीय अनुभव पर्यटकांना निश्‍चित येणार आहे.

पहिलाच महोत्सव!

अंचिपाका यांनी सांगितले, राज्यात असा महोत्सव पहिल्यांदाच होणार आहे. महोत्सवांतर्गत आम्ही पर्यटकांना या भागातील नैसर्गिक आकर्षणे दाखवणार आहोत. पर्यटन विभागाच्या ‘गोवा बियॉन्ड बीचेस'' उपक्रमावर या फेस्ताविस्तामुळे भर दिला जाणार आहे. दूधसागर फेस्ताविस्ता स्थानिक आणि पर्यटक दोघांनाही आकर्षित करेल, अशी अपेक्षा असल्याचे त्यांनी नमूद केले.