पणजी : राज्‍यात होणाऱ्या राष्ट्रीय क्रीडा स्‍पर्धा गुजरातला नेण्यामागे मोठे राजकारण आहे. गुजरात विधानसभेच्‍या निवडणुका तोंडावर आल्‍या आहेत. या पार्श्वभूमीवर मतदारांना खूष करण्यासाठी या स्‍पर्धा गोव्‍यातून गुजरात राज्‍यात हलविल्‍याचा आरोप तृणमूल काँग्रेसचे ट्रोजन डिमेलो यांनी केला. पक्षाच्‍या येथील कार्यालयात घेतलेल्‍या पत्रकार परिषदेत ते बोलत होते. यावेळी कोअर कमिटीच्‍या सदस्य अविता बांदोडकर आणि प्रतिभा बोरकर उपस्‍थित होत्‍या.

राज्‍यात होऊ घातलेल्‍या राष्ट्रीय क्रीडा स्‍पर्धा गोव्‍याबाहेर जाणे, हे भाजप सरकारसाठी लज्जास्‍पद आहे. गेली दहा वर्षे राज्‍यात भाजपचे सरकार आहे. या स्‍पर्धा 2008 साली होणार होत्‍या. दर दोन वर्षांनी होणाऱ्या स्‍पर्धा घेण्यास राज्‍य सरकारने विलंब केल्‍याने पाच राष्ट्रीय स्‍पर्धांना क्रीडापटू मुकले आहेत, असे बांदोडकर म्‍हणाल्‍या. स्‍पर्धा वेळेत न घेतल्‍याबद्दल राज्‍य सरकारला यापूर्वी एकदा 10 कोटी आणि एकदा 14 कोटी रुपयांचा दंड भरावा लागला आहे.

मुख्यमंत्र्यांचे अनोखे कॅसिनोप्रेम

भाजप सरकार कॅसिनोवर आकारला जाणारा जीएसटी कमी करण्याचा प्रयत्‍न करत आहे. खरे तर सरकारने औषधे आणि रुग्णालयातील खाटांवरील जीएसटी पूर्ण माफ करायला हवा. पण मुख्यमंत्री डॉ. प्रमोद सावंत कॅसिनोवरील जीएसटी कमी करण्यासाठी ताकद पणाला लावत आहेत. राज्‍यात अद्याप गेमिंग कमिशनरची नियुक्ती झालेली नाही, हे आश्‍चर्यकारक असल्‍याचे डिमेलो म्‍हणाले.

प्रमुख गोव्याचे, तरीही अपयश

केंद्रीय मंत्री श्रीपाद नाईक गोवा ऑलिम्पिक संघटनेचे प्रमुख आहेत. तरीही राष्ट्रीय क्रीडा स्‍पर्धा गुजरातला गेल्‍या. गोवा सरकारने गुजरातच्‍या निवडणुकांसाठी राष्ट्रीय क्रीडा स्‍पर्धांचा मान त्‍यांना दिला असून यात राज्‍य सरकारचे अपयश आहे, असे डिमेलो म्‍हणाले.