शिवोली: घरच्या टेरेसवरील पावसाचे पाणी पिंपात (बॅरल) भरत असताना शेजारच्या प्रसाद सिमेपुरुषकर कुटुंबीयांशी झालेल्या शाब्दीक बाचाबाचीचे रूपांतर मोठ्या वादात झाले. त्यानंतर अनिता सिमेपुरुषकर आणि शैलेश सिमपुरुषकर या दाम्पत्यावर हल्लेखोरांनी तलवारीने वार केले. यात शैलेश जखमी झाले. हल्ला करणारे प्रसाद सिमेपुरुषकर, त्यांचा पुत्र विनीत आणि जवळचा नातेवाईक हे तिघेही फरार असल्याची माहिती हणजुण पोलिस स्थानकाचे उपनिरीक्षक अमित तरल यांनी दिली. अनिता सिमेपुरुषकर यांनी पोलिस स्थानकात रितसर लेखी तक्रार दाखल केली आहे.

क्षुल्लक कारणांवरून उद्भवलेल्या भांडणाचे पर्यवसान शैलेश सिमेपुरुषकर यांच्यावर प्राणघातक हल्ल्यात झाले. ही घटना सोमवारी गुडे -शिवोलीत घडली. येथील श्री काळोबा मंदिर परिसरात वास्तव्य करून राहाणाऱ्या अनिता शैलेश सिमेपुरुषकर या सोमवारी सकाळी आपल्याघरच्या टेरेसवरील पावसाचे पाणी पिंपात भरत होत्या.

तेव्हा शेजारच्या प्रसाद सिमेपुरुषकर कुटुंबीयांशी त्यांची शाब्दिक बाचाबाची झाली. त्यानंतर संध्याकाळी साडेचारच्या दरम्यान अनिता सिमेपुरुषकर या पती शैलेश सिमेपुरुषकर यांच्यासमवेत कारने म्हापसा येथे जाण्यास निघाल्या होत्या. गुडेतीलच प्रसाद सिमेपुरुषकर व अन्य तिघांनी त्यांची गाडी अडवली आणि शैलेश सिमेपुरुषकर यांच्या डोक्यावर तलवारीने सपासप वार करण्यास सुरुवात केली. त्‍यात शैलेश जखमी झाले.