संजय घुग्रेटकर

खांडोळा : येथील प्राचीन श्री गणेश मंदिरावर मध्यरात्री दरोडा खालून मंदिरातील लाखो रुपयांचा ऐवज चोरट्यांनी लंपास केला. मूर्तींची प्रभावळ, मुकुट, हात, एका पायाचे पाऊल, अक्षयपात्र, सूर्य, चंद्र प्रतिमा, रथाचे काही साहित्याही घेऊन चोरट्ये पसार झाले. ही घटना मध्यरात्री घडल्याची शक्यता व्यक्त करण्यात येत आहे. 5 ते 10 लाखांची मालमत्ता चोरी झाल्याची शक्यता आहे.

चोरट्यांनी मंदिराच्या मुख्य दरवाजाच्या कड्या तोडल्या असून आतील सीसीटीव्ही यंत्रणा निकामी केली. त्यानंतर त्यांनी मंदिरातील मौल्यवान सोने, चांदीचे दागिणे व इतर मूर्तींचे सजावट साहित्यांची चोरी केली. मंदिराचा संग्राह्य रुम (स्टोररूम) फोडून तेथील बरेच साहित्य उचलले असून काही साहित्य मंदिराच्या बाहेर फेकून दिले.

चोरट्यांना मुख्य दरवाजा फोडून ते आत गेले असून बाहेर पडताना दुसरा दरवाजा तोडून बाहेर आले. उत्तरेकडील दरवाजातून ते बाहेर पडले असून उत्तरेकडील फाटकाजवळ दोन कळशा, चौरंग आणि काही साहित्य, फंड पेटीतील रक्कम टाकून चोरटे पसार झाल्याचे प्रथम दर्शन स्पष्ट झाले आहे.

याप्रकरणी पोलिस तपासणी सुरू असून वरिष्ठ पोलिस अधिकारी सी. एल. पाटील, विजयकुमार चोडणकर, सुरज काणकोणकर, नितेश काणकोणकर इतर पोलिस ज्ञानेश्वर च्यारी, अवधूत चोडणकर, महेश गोवेकर, जितेंद्र गावडे यावेळी उपस्थित होते. सकाळी श्वानपथकाद्वारे तपास सुरू केला.

पोलिस गस्त हवी

विस्तारणाऱ्या माशेल-खांडोळ्यात पोलिसांची गस्त हवी. माशेलात पोलिस चौकी असूनही त्यांचा विशेष उपयोग होत नाही. रात्रीच्या वेळी कुठेही गस्त दिसत नाही. त्यामुळे अशा चोरट्यांना संधी मिळते. एखादी चोरी झाली तरच गस्त सुरू केली जाते, त्यानंतर कुठेही पोलिसांची गस्त नसते. किमान रात्रीच्या वेळी माशेल-खांडोळा परिसरात पोलिसगस्त असणे गरजेचे आहे, असे मत आपचे नेते नोनू नाईक यांनी व्यक्त केले.

देवदेवतांची भूमी

माशेल पंचक्रोशी म्हणजे देवदेवतांची भूमी आहे. या भूमीत जवळ जवळ पन्नास लहान मोठी मंदिरे आहे. या मंदिरातून मौल्यवान मूर्ती, दागिणे व इतर साहित्य आहे. माशेलात सोनारांची आस्थापने, बॅंका, सहकारी सोसायट्या आहेत. या ठिकाणाचे रक्षण करण्यासाठी पोलिस व जनतेने सतर्क होण्याची गरज आहे, असेही मत ज्येष्ठ नागरिकांनी व्यक्त केले.