पणजी : गेले दोन आठवडाभरात कोसळलेल्या मुसळधार पावसामुळे (Heavy Rain) शेतीसह भाजीपाल्‍याचीही (Vejitables) प्रचंड हानी (Loss) झाली आहे. परिणामी पुन्हा एकदा भाज्यांचे दर सर्वसामान्‍यांच्‍या आवाक्‍याबाहेरचे झाले आहेत. फलोत्पादन महामंडळाकडून उपलब्ध केल्या जाणाऱ्या काही भाज्यांचे दरही वाढल्याचे दिसून येत आहे. यात भेंडी, गाजर आणि चिटकी यांचा समावेश आहे, तर वालपापडी, फ्लॉवर यांच्या दरामध्ये घसरण झाली आहे.

कांदा, कोबीचा दर स्‍थिर
कोबीचा दर प्रति किलो २२ रु. असा स्थिर आहे. कॉलिफ्लॉवरचा दर प्रति नग ३६ रुपये होता, तो ६ रुपयांनी कमी होऊन ३० रुपये झाला आहे. तर वालपापडीच्या दरामध्ये बदल झालेला असून प्रति किलो ५५ रुपयांवरून दर ४६ रुपयांवर आलेला आहे. हिरवी मिरची २८ वरून घसरून प्रति किलो २२ रुपये या भावाने विकली जात आहे. कांद्यात जास्त फरक पडलेला नसून ३२ रु. प्रति किलो असा त्याचा दर होता. त्यात एका रुपयाने वाढ होऊन कांदा ३३ रुपये दराने विकला जात आहे. त्याचप्रमाणे बटाटा आणि टोमॅटो यांच्या भावात फरक दिसून आलेला आहे. बटाट्याचा भाव प्रति किलो २४ रुपये असा होता, तो आता २७ रुपये प्रति किलो झाला आहे. तर टोमॅटोचा दर २६ रुपयांवरून वाढून २८ रुपये प्रति किलो असा झाला आहे.