Goa State GI Recognition

पणजी: राज्यातील कोरगुट तांदूळ, मुसराद आणि मांगेलाल आंबा, करवंटी कोरीव कला, ताळगावची वांगी आणि काजू बोंडू या सहा वस्तू लवकरच ‘जीआय’ मानांकन प्राप्त होण्याच्या मार्गावर आहेत. या संबधीचे अर्ज स्वीकारले गेले आहेत. केवळ याला आता मंजुरी मिळणे बाकी असल्याने सहाही वस्तूंना लवकरच जीआय मानांकन मिळेल, असे विज्ञान-तंत्रज्ञान मंडळाचे अधिकारी दीपक परब यांनी सांगितले.

दरम्यान, यापूर्वी राज्यातील खाेला मिरची, हरमल मिरची, काजू फेणी, मंडोळी केळी, खाजे, मानकुराद, गोवा काजू, आगशीचे वांगे, सातशिरा भेंडी, बेबिंका आदी वस्तूंना यापूर्वी जीआय मानांकन देऊन गौरविण्यात आले आहे.

‘जीआय’चे होतील लाभ

एखाद्या वस्तूचे उत्पादन एका विशिष्ट प्रदेशात घेतले जात असल्याचे त्या वस्तुला भौगोलिक सूचकांक मानांकन(जीआय) मानांकन देण्यात येते. कोणत्याही उत्पादन किंवा वस्तूला जीआय मानांकन मिळाल्यास त्या उत्पादनाचे उगमस्थान निश्चित होते तसेच उत्पादनाची गुणवत्ता तसेच नफा कायम ठेवण्यासाठी त्याचा फायदा उत्पादकांना होतो. जीआय मानांकनामुळे उत्पादकाला अनेक अधिकार प्राप्त होतात. भेसळयुक्त उत्पादन, वस्तूची बनविणे किंवा तिची विक्री करणे याला एकप्रकारे आळा घालण्यास देखील मदत होते.