National Junior Kabaddi Tournament गोव्याच्या मुलींनी राष्ट्रीय ज्युनियर कबड्डीत स्पर्धेत अप्रतिम खेळ केला. त्यांनी ‘फ’ गटात दोन्ही सामने जिंकून अव्वल स्थान मिळविले. स्पर्धा हैदराबाद येथे सुरू आहे.

गोव्याच्या मुलींनी स्पर्धेतील मोहिमेला शानदार सुरवात करताना गुरुवारी रात्री चुरशीच्या लढतीत यजमान तेलंगणाला ४६-४४ असे दोन गुणफरकाने हरविले होते.

त्यानंतर शुक्रवारी त्यांनी मातब्बर उत्तर प्रदेशला ३४-३१ असे तीन गुणांच्या फरकाने नमवून सलग दुसऱ्या विजयासह उपउपांत्यपूर्व फेरी गाठली.

सामन्यातील सहा मिनिटे बाकी असताना गोव्यापाशी सात गुणांची आघाडी होती. त्या जोरावर त्यांनी आगेकूच राखली. बाद फेरीत आता गोव्यासमोर मध्य प्रदेशचे आव्हान असेल.

गतवेळी ब्राँझपदक जिंकलेल्या गोव्याच्या मुलांनीही उपउपांत्यपूर्व फेरीत प्रवेश केला. त्यांनी गुजरातचा ४०-२५ असा १५ गुणफरकाने लीलया पराभव केला.

गुजरातला हरियानाविरुद्धही पराभूत व्हावे लागले. तीन संघांच्या ‘ब’ गटात दोन्ही सामने गमावल्यामुळे गुजरातचा संघ साखळी फेरीतच गारद झाला.

एक सामना बाकी असताना हरियाना आणि गोव्याने बाद फेरी गाठली. उभय संघातील विजेता संघ गटात अव्वल ठरेल.