Goa tourism beach stray dogs waste problem

पणजी: गोव्यातील समुद्रकिनारे पर्यटकांनी गजबजले आहेत. त्यामुळे किनारे स्वच्छ असणे महत्त्वाचे आहे. परंतु समुद्रकिनाऱ्यांवरील कचरा आणि भटक्या कुत्र्यांच्या समस्येमुळे स्थानिक व्यावसायिक व पर्यटक संतप्त झाले आहेत. गोवा पर्यटन विभागाने नियुक्त केलेल्या समुद्रकिनारा स्वच्छता कंत्राटदाराला कचरा संकलन नियमित करण्यात अपयश आले आहे.

याबाबत बोलताना क्रुझ कार्दोझ यांनी सांगितले की, कचऱ्यासोबतच भटक्या कुत्र्यांची समस्या गंभीर बनत आहे. भटकी कुत्री समुद्रकिनाऱ्यांवर सतत फिरत असतात आणि पर्यटकांच्या मागे धावतात. त्‍यामुळे त्‍यांच्‍यात भीतीचे वातावरण तयार होत आहे. शॅक्‍समालकांनी आपल्या परिसरात स्वच्छतेसाठी योग्य कचरा व्यवस्थापन पद्धती राबविल्या आहेत. परंतु कंत्राटदाराच्या अपयशामुळे आमच्या प्रयत्नांवर पाणी फिरत असल्याचे मत त्यांनी व्यक्त केले आहे.

दरम्‍यान, आजही कचरा आहे तसाच आहे. त्यामुळे उद्या सोमवारी उत्तर आणि दक्षिण गोव्यातील शॅक्‍समालक पर्यटन खात्याचे संचालक सुनील अंचिपका यांची भेट घेणार असल्याचे क्रूझ कार्दोझ यांनी सांगितले.

पर्यटनमंत्र्यांना लिहिले पत्र

शॅक्‍समालक कल्याण संस्थेने पर्यटनमंत्री रोहन खंवटे यांना पत्र लिहून कंत्राटदाराच्या अनियमिततेबाबत तक्रार देखील केली आहे. संस्थेचे अध्यक्ष क्रुझ कार्दोझ म्हणाले की, वाहन बिघाड झाल्याची कारणे देत कंत्राटदार कचरा गोळा करत नाही. त्‍यामुळे समुद्रकिनाऱ्यांवर अस्वच्छता पसरत असून, पर्यटनस्थळाची प्रतिमा खराब होत आहे. याच कचऱ्यामुळे पर्यावरण आणि आरोग्याच्या दृष्टीने गंभीर धोके निर्माण होत आहेत.